Gazeta opozitare serbe Danas ka zbuluar detaje nga versioni i ri i propozimit franko-gjerman që u dorëzua te Kosova dhe Serbia nga Mirosllav Lajçak gjatë kësaj jave.
Sipas asaj që shkruan kjo gazetë, nuk ka devijime prej disa parimeve themelore – Kosova merr njohjen, përkatësisht anëtarësimin në Këshill të Evropës – kurse Serbia merr Asociacionin e Komunave me Shumicë Serbe.
Këto Danasi pretendon t’i ketë mësuar nga qarqet diplomatike.
Se versioni më i fundit u është dorëzuar palëve e kishte konfirmuar edhe shefi i diplomacisë evropiane, Josep Borrell. Ai një konfirmim të tillë e kishte bërë gjatë Samitit të Tiranës.
Sipas burimeve të mediumit të lartpërmendur, nuk do të ketë garantim të anëtarësim të dy vendeve në Bashkimin Evropian (BE) por se do të ketë investime dhe fonde të ndryshme.
Sipas bashkëbiseduesve të Danasit, thuhet që në dokumentin e ri të propozuar është ndryshuar “ideja fillestare për formimin e Asociacionit të Komunave me Sshumicë Serbe” dhe se nuk do të jetë fjala për Asociacionin e paraparë sipas marrëveshjes së Brukselit të vitit 2015.
Danas thotë se presidenti i Serbisë Vuçiq ka vetëm pak javë që të shprehë mendimin e tij për propozimin e ri./Nacionale