Në mbledhjen e sotme të Qeverisë, kryeministri Kurti shfuqizoi disa nga vendimet që ishin marrë nga ish- kryeministri Ramush Haradinaj.
Përveç shfuqizimit të vendimit për rritjen e pagave dhe vendimit për përfitimet financiare të kabinetit qeveritar pas mandatit, Qeveria Kurti mori vendim edhe për shkarkimin e koordinatorëve nacionalë, tre nga të cilët ishin emëruar në vitin 2018, ndërsa një vitin e kaluar.
Koordinatorët e emëruar nga Haradinaj, kanë pasur pagë mujore prej 2000 euro.
Sipas një përgjigjeje që IndeksOnline ka marrë nga Zyra për Komunikim me Publik e Kryeministrit, bëhet e ditur edhe shuma që këta koordinatorë kanë marrë për detyrën që kanë kryer gjatë emërimit të tyre deri në janar të këtij viti.
1. z. Besnik Tahiri, Koordinator Nacional për Reforma Shtetërore, i emëruar më 16/03/2018 ka realizuar pagën mujore bruto 2.000€ (Totali nga periudha e emërimit deri janar 2020 është 45.247,50€ Bruto )
2. z. Rexhep Hoti, Koordinator Nacional për Kulturë, Rini dhe Sport, i emëruar me 29/05/2018 ka realizuar pagën mujore bruto 2.000€ (Totali nga periudha e emërimit deri janar 2020 është 45.341.76€ Bruto )
3. z. Mendim Rugova , Koordinator Nacional për Ndryshime Klimatike dhe Çështje të Ambientit, i emëruar me 29/05/2018 ka realizuar pagën mujore bruto 2.000€ (Totali nga periudha e emërimit deri janar 2020 është 40.359.50 € Bruto )
4. z. Fatos Makolli, Koordinator Nacional kundër Ekstremizmit të Dhunshëm dhe Terrorizmit, i emëruar me 12/02/2019 ka realizuar pagën mujore bruto 2.000€ (Totali nga periudha e emërimit deri janar 2020 është 17.765.00 € Bruto ).
Kujtojmë që, pas këtij vendimi nga Qeveria Kurti ka reaguar edhe ish-kryeministri Haradinaj.
Ai ka thënë që brenda vetëm një javë qeverisëse, u vendos një standard i ri i rrezikshëm dhe jodemokratik i mosrespektimit të Gjykatës Kushtetuese si autoritet përfundimtar i përcaktimit të përputhshmërisë së ligjeve me Kushtetutën.