Presioni i madh amerikan drejt Kosovës për heqje të taksës dje është konkretizuar në reagime senatorësh e zyrtarësh të lartë të administratës së Trump të cilët kërkojnë rishqyrtimin e prezencës ushtarake në Kosovë.
Senatori amerikan, David Perdue, ka qenë i pari që ka folur për një gjë të tillë, derisa Richard Grenell dhe Robert O’Brien e kanë shpërndarë një qëndrim të tillë.
Për kthimin e trupave amerikane nga Kosova në SHBA kanë folur hapur edhe djali i presidentit Trump dhe senatori tjetër republikan Rand Paul, shkruan Gazeta Express.
Por cili është qëndrimi i NATO-së lidhur me këto paralajmërime dhe a është e udhës që trupat amerikane të largohen nga Kosova.
Në një përgjigje ekskluzive për Gazetën Express një zyrtar i Aleancës Euroatlantike ka thënë se NATO mbetet e përkushtuar plotësisht për misionin e KFOR-it, mision i cili nën mandatin e Kombeve të Bashkuara vazhdon të sigurojë një mjedis të sigurt dhe lëvizje të lirë për të gjithë komunitetet në Kosovë.
“Siguria dhe stabiliteti në Ballkanin Perëndimor janë të rëndësishme për NATO-n, paqen dhe stabilitetin në Evropë.
NATO mbetet plotësisht e përkushtuar në misionin e KFOR-it, i cili nën mandatin e Kombeve të Bashkuara vazhdon të ofrojë një mjedis të sigurt dhe liri të lëvizjes për të gjitha komunitetet në Kosovë”, ka thënë ky zyrtar për Express.
Tutje në përgjigje thuhet se NATO mbështet vazhdimin e dialogut të ndërmjetësuar nga Bashkimi Evropian mes Prishtinës dhe Beogradit.
“Kjo është jetike për Beogradin dhe Prishtinë, por edhe për paqen dhe sigurinë rajonale”, ka shtuar tutje.
Nga NATO thonë se presin që Serbia dhe Kosova të përkrahin nismat që çojnë në normalizim të situatës dhe uljen e tensioneve.
“Llogarisim në të dyja palët që të shfaqin përkushtim, përmbajtje dhe përkrahje për çfarëdo përpjekje që çon në normalizimin e gjendjes së sigurisë dhe uljen e tensioneve”, ka përfunduar ky zyrtar për Gazetën Express.
Për paralajmërimet e Shteteve të Bashkuara për rishqyrtimin e pranisë ushtarake në Kosovë ka pasur reagime të shumta në Kosovë.
Presidenti i Republikës së Kosovës, Hashim Thaçi, ka bërë thirrje për një mbledhje urgjente të qeverisë për heqje të taksës, derisa sot në Kuvendin e Republikës së Kosovës do të mbahet një seancë e jashtëzakonshme ku do të diskutohet për zhvillimet e fundit rreth raporteve Kosovë-SHBA. /GazetaExpress/