Kryetarja e Kuvendit të Kosovës, Vjosa Osmani, ka thënë se s’ka qenë në takim me Albin Kurtin para marrjes së vendimit për shkarkimin e Agim Veliut nga pozita e ministrit të Brendshëm.
Siç ka thënë nënkryetarja e LDK-së një gjë e tillë është një gënjeshtër.
“Është një gënjeshtër e kulluar”, ka thënë Osmani për Gazetën Blic.
Kryetari i Qeverisë sot ka marrë vendim për shkarkimin e kreut të MPB-së, Agim Veliu, pas deklarimeve që ky i fundit ka bërë dje lidhur me situatën në vend pas pandemisë COVID-19.
Në arsyetimin për shkarkim, Kurti ka thënë se Veliu ka përhapur panik kur ka thënë se numri i të infektuarve po rritet nga ora në orë.
Kreu i VV-së gjithashtu kishte deklaruar se Veliun e ka shkarkuar pas dakordimit me kreun e LDK-së, Isa Mustafa, gjë që u demantuar nga ky i fundit.
Mustafa ka thënë se Kurti s’është konsultuar rreth shkarkimit, duke paralajmëruar edhe prishjen e koalicionit.
Derisa vetë Veliu ka thënë se një vendim i tillë do të shqyrtohet në organet e Lidhjes Demokratike të Kosovës.
Në anën tjetër, Skënder Hyseni, ka paralajmëruar mocion votëbesimi për Qeverinë.
Njoftimi i plotë i Kurtit për shkarkimin e Agim Veliut:
Mbrëmë vonë, pas mesnate, Ministri i Punëve të Brendshme dhe Administratës Publike, z. Agim Veliu, për televizionin Klan Kosova, u deklarua kundër qëndrimit të Kryeministrit të Republikës së Kosovës mbi shpalljen e gjendjes së jashtëzakonshme. Ai, gjithashtu, në këtë deklarim, përhapë panik duke thënë se “numri i të prekurve po rritet prej ore në orë”. As Ministria e Shëndetësisë e as Instituti Kombëtar i Shëndetësisë Publike nuk thanë që numri i të infektuarve me COVID-19 po rritet nga ora në orë. Në këto momente, kur e gjithë administrata publike po bën përpjekje maksimale për të minimizuar dëmet nga virusi Korona, udhëheqësit e institucioneve qendrore, përfshirë këtu anëtarët e kabinetit qeveritar duhet të demonstrojnë maturi si në vendime ashtu edhe deklarime.
Përmes deklaratave të tij të bëra publikisht, por jo edhe të mbështetura me qëndrime të tij në mbledhje të brendshme, Ministri i Punëve të Brendshme dhe Administratës Publike, z. Veliu ka dëshmuar mungesë të theksuar lidershipi dhe ka minuar hapur punën e qeverisë, pjesë e të cilës ai është.
Në këto rrethana jam i detyruar të veproj, andaj edhe kam vendosur të shkarkoj z. Veliu nga detyra e Ministrit të Ministrisë së Punëve të Brendshme dhe Administratës Publike. Unë kam njoftuar Kryetarin e LDK-së, z. Isa Mustafa, për vendimin që kam marrë dhe po ashtu kam kërkuar prej tij që sa më shpejtë të ma dërgojë emrin e ministrit të ri.
Ndërkohë, deri në zgjedhjen e ministrit të ri, të gjitha vendimet brenda Ministrisë së Punëve të Brendshme dhe Administratës Publike do të merren nga zv. ministri aktual, z. Xhelal Sveçla.