Zëdhënësi i Lëvizjes Vetëvendosje, Përparim Kryeziu, ka zbuluar detaje se çfarë është biseduar gjatë vizitës së emisarit të BE-së për dialogun Kosovë- Serbi, Miroslav Lajçak në Lëvizjen Vetëvendosje, ku është takuar me liderin e saj, Albin Kurtin.
Kryeziu e ka bërë të qartë se në takim është diskutuar për procesin e dialogut, por nuk është prekur tema e asociacionit nga Lajçak.
“Lajçak është shumë i vetëdijshëm për qëndrimet dhe vlerësimet e LV-së në lidhje me të. Prandaj edhe nuk është paraqitur nevoja për riaktualizim të kësaj teme në takim me ne”, ka shkruar ai.
Postimi i plotë:
Në takimin me z. Lajcak është diskutuar për procesin e dialogut në vete. Asociacioni i Komunave me shumicë serbe nuk ka mundur të jetë temë e këtij takimi pasi z. Lajcak është shumë i vetëdijshëm për qëndrimet dhe vlerësimet e LV-së në lidhje me të.
Prandaj edhe nuk është paraqitur nevoja për riaktualizim të kësaj teme në takim me ne.
Të njëjtën konsideratë me gjasë nuk mund ta këtë pasur në takimet e tjera, veçanërisht me ata të cilët e kanë negociuar e përkahur si marrëveshjen e 2013- ës poashtu edhe atë të 2015-ës
Në fakt, me të drejtë, kjo temë mund të konsiderohet e mbyllur vetëm për LV-në, duke qenë e vetmja që e ka kundërshtuar marrëveshjen për Asociacionin e Komunave me shumicë Serbe që nga fillimi – atëherë kur edhe është dashur të shprehet kundërshtimi.
Kurse pas vendimit të Gjykatës Kushtetuese të 23 dhjetorit 2015, që e ka bërë praktikisht e përmbajtësisht projekt të pamundur në Republikën e Kosovës, kjo temë duhet të jetë e mbyllur edhe për gjithkë tjetër.