Persona të panjohur kanë vendosur pjesë të mbetjeve të një derri të prerë, në kutinë postare të shtëpisë së një familjeje myslimane në Schwamendingen të Cyrihut.
E. T. (31) është i zhgënjyer me shoqërinë ku jeton, e cila pretendon se ky lloj racizmi nuk ekziston në Zvicër. Dhe tani ka frikë edhe për sigurinë e nënës së tij, shkruan 20minuten.ch.
Sipas Alma Wiecken nga Komisioni Federal kundër Racizmit (FCR), çështja është e qartë: “Hedhja e mishit ose gjakut të derrit para institucioneve myslimane është tregues i një qëndrimi dhe motivimi anti-mysliman për veprën”.
Bishti i përdredhur i derrit dukej përmes pjesës së hapur të kutisë postare, këmbët ngjyrë rozë të copëtuara shiheshin brenda kutisë, më 9 tetor. “Ky është një sulm ndaj lirisë së besimit” thotë 32 vjeçari turk, sepse familja e tij është myslimane dhe nëna e tij mban shami.
Për të, nuk është incidenti i parë i këtij lloji: në të kaluarën, familja kishte gjetur rroba të vjetra, këpucë të ndyra apo edhe çanta me mbeturina, si jashtëqitje qeni në kutinë postare.
“Në fillim patëm menduar se fëmijët ose të rinjtë kishin bërë shaka”. Por mbetjet e mishit të derrit tani e kanë mbushur kupën. “Unë menjëherë informova policinë, e cila më pas dërgoi një polic te ne”, thotë T., përcjell albinfo.ch. Por polici i kishte thënë atij që nuk kishte të drejtë të bënte vetë padinë.
“Polici ka vepruar si duhet”, thotë për 20 minuten.ch, Marco Cortesi, zëdhënës i Policisë së Qytetit të Cyrihut. Djali nuk është qiramarrës – dhe për këtë arsye nuk ka të drejtë të bëjë ankesë.
“Unë ende shpresoj se policia do të hetojë dhe kapë së shpejti autorin ose autorët” thotë T. Ai tani është i shqetësuar për familjen e tij. “Shqetësohem sidomos kur nëna ime është vetëm. Po sikur dikujt t`i teket ta lëndojë?”.
Një kërcënim i tillë e shqetëson atë, sipas T. “Shumë zviceranë ende thonë se nuk ka racizëm në Zvicër. Kjo është e pakuptueshme për mua”.
Sipas Wiecken, FCR është në dijeni të incidenteve të ngjashme anti-myslimane. Duket e drejtë për të që të prekurit duhet t’i drejtohen policisë në këtë rast, transmeton albinfo.ch.
“Është e rëndësishme që policia të marrë seriozisht shqetësimet e të prekurve, veçanërisht në rastin e incidenteve raciste, dhe të marrë raporte”.