Lideri i Koresë Veriore, Kim Jong-un, mori pjesë në një paradë ushtarake të vendit të vet. Kjo ishte paraqitja e parë e tij në publik pas një kohe të konsiderueshme.
Në fotografitë e publikuara nga agjencia shtetërore e lajmeve shihet udhëheqësi me stil flokësh të ngjashëm si të gjyshit të tij, themelues i Koresë Veriore, Kim Il-sung, shkruan Independent.
Në mesnatë, Kimi u shfaq për t’i duartrokitur ushtarët që po parakalonin. Ndonëse nuk mbajti ndonjë fjalim, atij duket se i pëlqeu parada, sepse në fytyrë shihej i buzëqeshur. Ai puthi disa fëmijë, të cilët i dhuruan lule.
Politikani 37-vjeçar, i njohur më parë për mbipeshën e tij, ka qenë temë e spekulimeve rreth shëndetit, duke e marrë parasysh historinë familjare të sëmundjeve të zemrës. Babai dhe gjyshi i tij kanë vdekur nga problemet në zemër.
Raportohet se ai ka humbur së paku 20 kilogramë në muajt e fundit. Dallimi në pamjen trupore të tij u vërejt së pari në qershor, kur ishte paraqitur në publik pas një kohe të gjatë.
Ndryshe, raportohet se Koreja Veriore është duke u përballur me mungesë të ushqimit për shkak të thatësisë së këtij viti e stuhive të vitit të kaluar. Ekonomia është goditur edhe nga sanksionet e Shteteve të Bashkuara shkaku i programit bërthamor.