Ministrja e Jashtme e Kosovës, Donika Gërvalla e ka quajtur presidentin rus, Vladimir Putin, diktator, derisa tha se pushtimi i Ukrainës i kujton kohën kur Kosova u sulmua nga Serbia.
Përmes një publikimi në Twitter, Gërvalla deklaroi angazhimin e Kosovës për t’i dalë në ndihmë Ukrainës.
“Agresioni ndaj Ukrainës nga diktatori rus Putin na kujton kohën më të keqe në historinë tonë të re kur Kosova u sulmua nga liderë të ngjashëm brutalë të Serbisë. Kosova do të bëjë gjithçka që është e mundur për të ndihmuar dhe botën demokratike për ta fituar këtë luftë”, shkroi ministrja.
Ndryshe ditë më parë, ministrja Gërvalla ka paraqitur sanksionet e Kosovës ndaj Rusisë, transmeton lajmi.net.
Këto sanksione përfshijnë ngrirje të aseteve bankare e masa tjera financiare e po ashtu sanksione për individ e akterët politik të përfshirë në marrjen e vendimit për agresionin rus në Ukrainë.
Sanksionet konsistojnë në: ngrirje të aseteve në Republikën e Kosovës të individëve apo entiteteve të sanksionuara, ndalim udhëtimi në territorin e Republikës së Kosovës për individët e sanksionuar, ndalim për individë dhe entitete në Republikën e Kosovës, që të vënë në dispozicion fonde, qoftë në mënyrë direkte ose indirekte, për individët dhe entitetet e sanksionuara.
The aggression on Ukraine 🇺🇦 by Russia’s dictator Putin reminds us of the worst time in our recent history when Kosova was attacked by similar brutal leaders of Serbia. Kosova will do whatever possible to help 🇺🇦 and the democratic world to win this struggle.
— Donika Gërvalla-Schwarz (@gervallaschwarz) February 27, 2022