Në listën e votuesve në KQZ-së, numri i banorëve me të drejtë vote është më i madh se numri i popullsisë në Kosovë, kjo çështje po e habitë edhe kryeshefin e Agjencisë së Statistikave të Kosovës, Isa Krasniqin.
Krasniqi thotë se në bazë të vlerësimit të numrit të popullsisë të vitit 2018, Kosova ka një popullsi prej 1 milionë e 795 mijë banorë dhe nëse merret parasysh kontingjenti i votuesve potencial që janë diku përafërsisht prej 1 milionë e 800 mijë votues, del që ka më shumë votues sesa popullsi rezidente në Republikën e Kosovës.
Edhe pse ka marrë përsysh numrin e diasporës, sipas tij, ka një shifër më të madhe të listës së votuesve në krahasim me popullsinë rezidente në Republikën e Kosovës deri më 31 dhjetor 2018.
Ndërsa, në bazë të të dhënëve të KQZ -së për zgjedhjet e fundit të vitit 2017, numri i votuesve të regjistruar ishte 1 milionë e 888 mijë e 59 me një pjesëmarrje në zgjedhje 779 mijë e 729 votues ose 41.3%.
“Trupa e popullsisë rezidente ose trupa votuesve potencial rezident kur e heq grup moshën 0 deri 18 vjeç, atëherë është një numër prej 1 milionë e 272 mijë e 226 votues potencial. Por keni parasysh se në listën e Komisionit Qendror Zgjedhor janë të evidentuar çdo kush që ka të drejtë vote edhe prej popullsisë jorezidente që është e vendosur kudo në botë, që jeton jashtë Republikës së Kosovës. Popullsia jorezidente ka një pjesëmarrje shumë të vogël në zgjedhje që në një farë mënyre është e neglizhuar dhe në qoftë se përqindja e pjesëmarrjes në votime mund të jetë 39 përqind, përqindja reale në qoftë se bazohemi në kontingjentin e popullsisë rezidente del të jetë diku pak mbi 55 përqind”, thotë Krasniqi.
Alarmante për kryeshefin e ASK-së, Isa Krasniqi është rënia e numrit të popullsisë në Kosovë.
Krasniqi thotë se numri i banorëve po bie në vazhdimësi në bazë rënies së lindshmërisë, vdekshmëris ë dhe emigrimit të popullsisë.
Ai thotë se për këtë trendë të rënies, kanë alarmuar të gjitha institucionet e Kosovës, sepse nëse vazhdohet kjo rënie, në dekadat e ardhshme Kosova mund t’i ketë edhe më pak se 1 milion banorë.
“Në krahasim me vitin 2017, kemi një zbritje(rënie) diku përafërsisht prej 2 mijë banorëve në Republikanë e Kosovës. Pra, kemi një popullatë në rënie. Por kontingjenti i lindshmërisë ka një rënie, dhe kemi theksuar se është një alarm për Republikën e Kosovës, sepse rënia e lindshmërisë ndikon shumë pastaj në politika tjera sidomos në aspektin ekonomik e social që ka një ndikim esencial. Kjo është me rendësi për të marrë parasysh edhe me politike për periudha më afat gjate. Pastaj, nëse kemi edhe emigrim të popullatës jashtë dhe shtim të vdekshmërisë, sepse kontingjenti i moshës së vjetër vjen duke u rritur dhe kjo pastaj determinon zbritjen”, thotë ai.
Në pjesën tjetër të intervistës, Krasniqi flet edhe për tema të tjera siç janë, tregtia e jashtme, raportet tregtare, për GDP-në, për shkallën e papunësisë dhe çmimet e produkteve.