Mëngjesin e sotëm është gjetur pa shenja jete regjisorja Arzana Kraja. Lajmin e ka konfirmuar edhe Qendra Kinematografike e Kosovës
Përmes një njoftimi në Facebook, Qendra Kinematografike e Kosovës ka bërë të ditur se ka ndërruar jetë regjisorja Kraja.
“Jemi të shokuar nga lajmi për vdekjen e regjisores Arzana Kraja! Angazhimi i saj në fushën e kinematografisë ishte i jashtëzakonshëm. Ngushëllime familjes, miqve dhe gjithë bashkëpunëtorëve!”, shkruan në njoftimin e QKK’së.
Lajmin se ka vdekur një person e ka konfirmuar edhe zyra për informim e Policisë së Kosovës.
“Me datën 13.11.2019 rreth orës 09:08 policia ka pranuar një informatë, për një trup të pajetë në lagjen “Kalabria”, Prishtinë. Njësitë policore kanë dalë menjëherë në vendin e ngjarjes, përfshirë edhe ekipin mjekësor të emergjencës të cilët kanë konstatuar vdekjen e personit të gjinisë femërore. Policia po e trajton rastin si “vdekje e dyshimtë””, thuhet në përgjigjen e policisë.
Arzana Kraja është vajza e kryetarit të Akademisë së Shkencave dhe Arteve të Kosovës, Mehmet Kraja.