Ambasadori i Shteteve të Bashkuara të Amerikës në Kosovë, Philip Kosnett, ka deklaruar se Kosova i ka treguar botës se ushtria e saj është e aftë të ofrojë ndihmë për të gjithë të tjerët në rast nevoje, shkruan Gazeta Metro.
Kosnett ka marrë pjesë në një eveniment të organizuar nga Konsullata e Përgjithshme e Kosovës në New York, nën moton “Investimi i Diasporës shqiptare në Kosovë”.
Kosnett tha nga aty se Ushtria e Kosovës dhe shteti kosovar po tregojnë gjithmonë e më shumë aftësitë e tyre, duke përmendur rastin e fundit të tërmetit në Shqipëri.
Ai tha se kjo ishte një shembull nga ana e Kosovës se si duhet ngritur partneriteti rajonal mes shteteve të rajonit.
“Kohës së fundit, Kosova i ka treguar botës se kjo forcë e sigurisë është e aftë të ofrojë ndihmë për të tjerët në nevojë. Kur tërmeti tragjik goditi Shqipërinë, korpusi i reagimit ndaj emergjencave punoi krah për krah me ekipin tonë të reagimit ndaj krizave, duke dërguar ndihma orë pasi që ra tërmeti. Unë e shoh këtë si një shembull se si Kosova është ngritur në një partner mbështetës rajonal”, tha Kosnett, transmeton Gazeta Metro.
Ambasadori Kosnett, duke folur për prioritetet amerikane në Kosovë, tha se ato, së fundi, i ndajnë në tri sosh: në paqe, në drejtësi dhe në prosperitet.