Punësimet familjare dhe rehatimi i militantëve partiak po vazhdon edhe nga qeveria Kurti, ani pse këta të fundit u zotuan dhe tërë fushatën premtuan se do ta çkapin shtetin dhe do ta respektojnë meritokracinë, shkruan Gazeta Metro.
Deputeti i Lëvizjes Vetëvendosje, Salih Zyba, ka rehatuar djalin e axhës së tij si asistent të Rozeta Hajdarit, ministres të Ekonomisë, Punësimit, Industrisë dhe Investimeve Strategjike.
Drilon Zyba, është punësuar si asistent personal i ministres Hajdari, e cila do të udhëheq me njërën nga ministritë më të rëndësishme të qeverisë së Kosovës.
Sami Uka, vëllai i deputetit të Vetëvendosjes Fitim Uka, është emëruar si këshilltar i ministrit të Shëndetësisë, Arben Vitia.
Emërimi i tij si këshilltar i ministri Vitia është bërë më 12 shkurt, ndërsa për punësime tjera do të ketë njoftime.
Edhe familjarët e Xhelal Sveçles kanë pasur fatin e mirë gjatë këtyre punësimeve, Gëzim Sveçla është punësuar si shofer i zëvendëskryeministrit Haki Abazi, shkruan Gazeta Metro.
Punësime në ministri të Vetëvendosjes ka pasur edhe nga radhët e Lidhjes Demokratike të Kosovës, Rinor Kastrati, vëllai i gruas së ministrit të Infrastrukturës, Lumir Abdixhiku, është punësuar si këshilltar i kryeparlamentares Vjosa Osmani.
Po ashtu kujtojmë kryeministri Albin Kurti me të ardhur në krye të Qeverisë ka realizuar apo bërë ‘Rregulloren (QRK) – nr. 05/2020′, kjo rregullore parasheh përgjegjësinë e zyrës së kryeministrit, zëvendëskryeministrave dhe ministrave të tij, shkruan Gazeta Metro.
Sipas kësaj rregullore të Qeverisë Kurti, parashihet që zëvendëskryeministri i parë që në këtë rast i takon LDK’së, dhe në atë pozitë është Avdullah Hoti, kë të drejtë të punëson deri në 10 këshilltarë politikë.
Zëvendëskryeministri i dytë, i cili vjen nga radhët e Lëvizjes Vetëvendosje, Haki Abazi, po ashtu ka të drejtën të emëron deri në 10 këshilltarë politikë.