Mundësinë për të tërhequr 10 përqindëshin nga Trusti, e kanë shfrytëzuar edhe politikanët kosovarë. Në mesin e tyre ka edhe zyrtarë të VV’së, ani pse kjo parti e kishte kundërshtuar këtë ide. Por, sa është shuma e parave që kanë tërhequr ata? Më poshtë gjeni deklarimet e deputetëve
Rreth 30 politikanë kosovarë kanë tërhequr një pjesë të kursimeve të tyre nga Fondi Pensional i Kursimeve, meqenëse një gjë e tillë u mundësua me kalimin e Ligjit për Rimëkëmbje Ekonomike.
Shuma e parave që ata kanë tërhequr ministrat, deputetët dhe ish-deputetët, fillon nga 300 euro e shkon deri në 26 mijë euro.
Në mesin e politikanëve që kanë tërhequr mjete nga Trusti, janë edhe disa zyrtarë të Lëvizjes Vetëvendosje, pavarësisht se kjo parti kishte kundërshtuar këtë ide kur ishte propozuar.
Zyrtarët e VV’së që kanë tërhequr një pjesë të kursimeve janë: Albulena Haxhiu, Liburn Aliu, Adnan Rrustemi, Arjeta Rexhepi dhe Visar Korenica.
Ministrja e Drejtësisë, Albulena Haxhiu, ka deklaruar se ka tërhequr 2 mijë e 390 euro kursime, derisa Ministri i Mjedisit dhe Planifikimit Hapësinor Liburn Aliu, ka marrë 2 mijë e 658 euro nga Trusti.
Deputeti Adnan Rrustemi ka deklaruar se ka tërhequr 2 mijë e 84 euro nga Trusti.
Deputetja Arjeta Rexhepi ka thënë se ka tërhequr 1 mijë e 200 euro, derisa Visar Korenica ka marrë 1 mijë e 762 euro.
10 përqindëshin e kursimeve e kanë tërhequr edhe zyrtarë të Lidhjes Demokratike të Kosovës.
Kreu i LDK’së, Lumir Abdixhiku, ka marrë 5 mijë e 125 euro, derisa ish-kryeministri Avdullah Hoti ka marrë 6 mijë e 335 euro nga Trusti.
Edhe deputetët Arben Gashi e Armend Zemaj kanë vendosur të tërheqin 10 përqind të kursimeve.
Gashi ka marrë 4 mijë e 472 euro, derisa Zemaj ka tërhequr 5 mijë e 640 euro.
Kursimet i ka tërhequr edhe deputetja Hykmete Bajrami. Vlera e parave që ajo ka marrë është 4 mijë e 677 euro.
Të drejtën për të tërhequr kursimet e kanë shfrytëzuar edhe zyrtarë të Partisë Demokratike të Kosovës dhe Aleancës për Ardhmërinë e Kosovës.
Deputeti Bedri Hamza ka tërhequr nga Trusti rreth 10 mijë euro.
Gati tetë mijë euro më shumë se Hamza ka marrë deputeti tjetër i PDK’së, Gazmend Bytyqi.
Në regjistrin për deklarimin e pasurisë, Bytyqi ka thënë se ka marrë nga Trusti para në vlerë 17 mijë e 49 euro. Nuk dihet nëse ai i ka tërhequr të gjitha mjetet prej Trustit.
Ndërkohë, deputetja tjetër e kësaj partie, Floreta Zejnullahu ka tërhequr 300 euro.
“Të gjithë qytetarët që kanë kontribuar në Trustin Pensional të Kosovës deri në shumën 10 mijë Euro, në rast të tërheqjes së shumës 10 % (dhjetë për qind) nga ana e tyre, Qeveria e Kosovës do ta kompensoj tek TRUST-i Brenda pesë viteve të ardhshme në mënyrë që ata qytetarë t’i kenë mjetet e tyre për moshën e pleqërisë”.