Edhe njëherë tjetër të gjitha biletat për ndeshjen e radhës të Kosovës u ‘avulluan’ brenda 10 minutave.
Më 7 tetor u shitën të gjitha biletat për takimin Kosovë – Mali i Zi, që zhvillohet sot në stadiumin mitik ‘Fadil Vokrri’.
Të hënën e kaluar në orën 16:00 uebsajti që merret me shitjen e biletave ‘’tiks.app’’ u vërshua nga mijëra klikime brenda vetëm pak çastesh.
Shitja e shpejtë e biletave ka qenë një nga kritikat e tifozëve, të cilët assesi nuk po munden të sigurojnë një biletë për ta parë nga afër skuadrën dardane.
Por tregu i zi vazhdon të lulëzojë edhe kësaj radhe, me çmime jashtëzakonisht të mëdha.
Në faqet online ku bëhet shitja e biletave mund të shihet një numër të madh postimesh për shitje të biletave edhe pse kanë mbetur edhe pak orë në fillimin e takimit.
Një biletë VIP e cila kushton me çmim real 80 euro, tash kushton plotë 300 euro.
Ndërkohë, bileta e 20 eurove në pjesën perëndimore tash po shitet rreth 100 euro.
Kujtojmë se futbolldashësit kanë kritikuar këtë dukuri negative, që është e vetmja gjë që po prish atmosferën jashtë fushës në sukseset e përfaqësueses së Kosovës.