Kryeprokurori i Shtetit, Aleksandër Lumezi, e ka cilësuar “kontestuese” çështjen e moszbatimit të mundshëm të aktgjykimit të Gjykatës Kushtetuese nga Qeveria e Kosovës.
Më 31 mars Gjykata Kushtetuese konstatoi se vendim i Qeverisë për kufizimin e lëvizjes së qytetarëve ishte në mospërputhje me Kushtetutën.
Kushtetuesja tha se vendimi i kufizimit të lëvizjes do të mbetet në fuqi deri më 13 prill. Ky aktgjykim i organit më të lartë të drejtësisë në vend nuk po zbatohet nga Qeveria e Kosovës.
Mirëpo kryeprokurori i Shtetit, Aleksandër Lumezi, është shprehur i pasigurt nëse ekziston bazë juridike për fillimin e procedurës penale ndaj Qeverisë së Kosovës.
Lumezi ka nënvizuar se nuk dihet në qoftë se moszbatimi i aktgjykimeve të Gjykatës Kushtetuese parashihet të jetë vepër penale, sipas Kodit Penal të Republikës së Kosovës.
“Kjo është një çështje kontestuese. Moszbatimi i vendimeve të gjykatave të rregullta është vepër penale, ndërkaq moszbatimi i vendimeve të Gjykatës Kushtetuese as unë nuk mund të them me siguri në qoftë se ka bazë juridike për fillimin e ndjekjes penale ndaj dikujt”, ka thënë Lumezi për “Insajderin”.
Kryeprokurori i Shtetit konsideron se ende nuk ka bazë të mjaftueshme për fillimin e procedurës penale ndaj të dyshuarve për moszbatimin e vendimit të 31 marsit të Gjykatës Kushtetuese. “Ende nuk kemi bazë të mjaftueshme për të filluar procedurën penale. Jo hetimet. Hetimet janë një stad më i lartë i procedurës penale”, ka thënë Lumezi. “Kështu që vetëm moszbatimi i vendimeve gjyqësore të gjykatave të rregullta konsiderohet vepër penale”.
Megjithatë, kryeprokurori Lumezi ka paralajmëruar se kjo çështje do të shqyrtohet nga Prokuroria e Shtetit.
“Me patjetër do ta shqyrtojmë dhe do të vendosim në qoftë se ka elemente të veprës penale për të filluar ndjekjen ndaj dikujt. Por ende nuk e kemi shqyrtuar”, ka thënë ai në një bisedë me gazetën.
Të dielën, kur u shfuqizua vendimi i Qeverisë së Kosovës për kufizimin e lëvizjes së qytetarëve, Ministria e Shëndetësisë, e autorizuar nga Qeveria, prezantoi masat e reja të kufizimit të lëvizjes së qytetarëve.
Vendimi, sipas Qeverisë, është mbështetur në dispozitat ligjore të Ligjit për Luftimin dhe Parandalimin e Sëmundjeve Ngjitëse, si dhe duke u bazuar në konstatimet e aktgjykimit të Gjykatës Kushtetuese të Republikës së Kosovës, numër KO54/20, të datës 31 mars 2020.
Në bazë të këtij vendimi që nga data 15 prill, në oren 06:00, qytetarët e Kosovës nuk do të lejohen të dalin nga shtëpitë. Ata do të kenë të drejtë të lëvizin në rrugë vetëm për 1 orë e gjysmë në ditë dhe atë vetëm për nevoja thelbësore.