Që nga paraqitja e virusit Covid-19 në Kosovë, mantel-bardhët ishin në përballje të drejtpërdrejtë më këtë sëmundje pandemike.
Por, për kontributin e tyre, në shenjë mirënjohjeje për gjithë punën e palodhshme, dizajnerja Agnesa Elshani nga studio e dekoreve p’rralla, ka befasuar stafin e Klinikës Infektive në QKUK, duke përcjellë mesazhe ngrohtësie.
Veç kësaj, dizajnerja Elshani, ka dhuruar edhe lulebore, meqë ajo simbolizon pastërtinë dhe qysh në kohë të lashta është përdorur si bimë terapeutike për kurimin e infeksioneve të ndryshme.
‘’Dhuratë e përgatitur nga ‘p’rralla’, për stafin e Klinikës Infektive në QKUK. Ëmbëlsirë që të u ëmbëlsojmë pak këto kohë të hidhura, në shoqërinë e luleborave të cilat përveç hijeshisë së tyre të pakundërshtueshme, njihen dhe si bimë jashtëzakonisht terapeutike, lule të cilat mbjellja e tyre është një traditë që ka vazhduar në trojet shqiptare prej shumë vitesh’’, thuhet në njoftimin e lëshuar nga p’rralla.
Lidhur më këtë, ajo ka pranuar falënderime për donacion nga drejtoresha e Klinikës Infektive, Dr. Lindita Ajazaj – Berisha.
