Artistja shqiptare, Dua Lipa, në një intervistë për revistën “Rolling Stone” në Amerikë nuk ka lënë pa përmendur edhe vendlindjen e saj, Kosovën.
Ajo ka folur për periudhën kur u transferua në Kosovë, si edhe momentet e tmerrshme që prindërit e saj kishin përjetuar nga serbët, duke u detyruar të largoheshin për në Mbretërinë e Bashkuar.
Revista amerikane, gjithashtu ka dhënë informacion edhe për gjyshin e saj, historianin Seit Lipa, i cili dikur ishte edhe drejtor i Institutit të Historisë në Prishtinë.
Dua ka kujtuar se si gjyshi i saj u pushua nga puna nga serbët. Kjo pasi nuk pranoi të rishkruante duke falsifikuar historinë ashtu siç kërkuan ata.
“Gjyshi im nga ana e babait po shkruante libra për gjithçka që po ndodhte. Kur ndodhi okupimi, forcat serbe kërkuan që ai të rishkruante historinë. Ai nuk pranoi dhe ai humbi punën e tij. Kështu që është pjesë e asaj që unë jam dhe qëndroj pranë gjërave në të cilat besoj”, ka thënë Dua Lipa për “Rolling Stone”.
Ndërsa luftërat u shtuan, prindërit e Dua Lipës u larguan nga universiteti, babai i saj ishte pjesë e grupit rock të quajtur “Oda” dhe po studionte stomatologjinë, ndërsa nëna e saj po studionte për drejtësi. Ata më pas u vendosen në një komunitet të refugjatëve të Kosovës që ishin bashkuar në Camden për t’i shpëtuar dhunës në vendlindje.
Si shumë emigrantë, ata humbën jetën profesionale dhe do t’u duhej të punonin në bare dhe restorante, duke mbajtur shpesh punë të shumta dhe duke ndjekur shkollën e natës.
Dua Lipa, emri i së cilës do të thotë “dashuri” në shqip, lindi tre vjet pas lëvizjes së tyre. Në moshën nëntëvjeçare, ajo filloi të kalonte të shtunat e saj në shkollën e teatrit “Sylvia Young”, në të cilën kanë shkuar edhe emrat tjerë të njohur si: Rita Ora, Tom Fletcher dhe Amy Ëinehouse.
Një mësues muzike në këtë shkollë i kërkoi asaj të ngrihej dhe të këndonte. Më pas, ai dërgoi Lipën në një klasë më të përparuar, një që ishte plot me adoleshentë.
“Unë u tmerrova, por ai ishte personi i parë që më tha se mund të këndoja”, kujton Dua.
Lipa u rrit duke e ditur se Londra ishte vendlindja e saj, por nuk ishte në të vërtet shtëpia e saj.
“Me situatën e refugjatëve, njerëzit nuk e kuptojnë që njerëzit nuk do të largohen nga vendi i tyre nëse nuk do të kishin nevojë. Plani ishte gjithnjë të ktheheshim në Kosovë. Dhe pastaj arrita atje, unë isha vajza shqiptare që flisja shqip me një theks anglisht”. Por ajo dëshironte të kthehej në Londër, në klasat e muzikës dhe mundësitë më të mëdha që ndiente se ishin atje. Në moshën 15 vjeç, ajo i bindi prindërit e saj që ta linin të transferohej me vajzën e një shoku të familjes në Camden, ku ajo kaloi pjesën tjetër të viteve të saj të adoleshencës në thelb pa mbikëqyrje, duke e bërë vetë ushqimin, duke marrë urdhra për të pastruar dhomën e saj dhe duke bërë vet të gjitha gjërat”, ka shkruar më tej revista “Rolling Stone”.