Një lloj i ri i mutacionit Omicron të koronavirusit është identifikuar në të paktën pesë vende në Evropë dhe ka të ngjarë të dominojë në javët e ardhshme, sipas Qendrës së BE-së për Kontrollin dhe Parandalimin e Sëmundjeve (ECDC).
Kjo ka të ngjarë të kontribuojë në një rritje të numrit të rasteve të COVID-19 në javët apo muajt e ardhshëm, sipas një përditësimi epidemiologjik të publikuar nga ECDC.
“Vendet duhet të qëndrojnë vigjilente për shfaqjen dhe përhapjen e llojit BQ.1 dhe të mbajnë testime diagnostike të ndjeshme dhe përfaqësuese,” kërkoi drejtori i ECDC Andrea Ammon.
“Vendet duhet të vazhdojnë të monitorojnë normat e rasteve të koronavirusit, veçanërisht te njerëzit e moshës 65 vjeç e lart. Duhet të monitorohen gjithashtu tregues të tillë si shtrimet në spital, pranimet dhe zënia e njësive të kujdesit intensiv, si dhe vdekjet”, shtoi ai .
Studimet paraprake laboratorike në Azi tregojnë se varianti BQ.1 i Omicron ka aftësinë të shmangë ndjeshëm përgjigjen e sistemit imunitar.
Aktualisht, nuk ka asnjë indikacion që soji i ri çon në sëmundje më të rëndë në krahasim me variantet e tjera të Omicron tashmë të pranishme.
Doza shtesë përforcuese pritet të nevojiten për grupet me rrezik më të lartë të sëmundjeve të rënda, të tilla si të rriturit mbi 60 vjeç, personat me imunitet të dobët dhe gratë shtatzëna.
Siç raportohet nga ECDC, vendet me normat më të larta të raportuara për mostrat e mbledhura në javën e 40-të janë Franca (19%), Belgjika (9%), Irlanda (7%), Holanda (6%) dhe Italia ( 5%).