Ministri i Jashtëm turk, Mevlut Cavusoglu tha se Suedia dhe Finlanda duhet ta ndalojnë mbështetjen e grupeve TERR0RlSTE në vendet e tyre, të ofrojnë garanci të qarta sigurie dhe ta heqin ndalimin e eksporteve të Turqisë nëse duan që Turqia ta mbështesë anëtarësimin e tyre në NATO.
Duke folur pas një takimi të ministrave të jashtëm të NATO-s në Berlin, Cavusoglu tha se është takuar me homologët e tij suedezë dhe finlandezë dhe se ata të gjithë po përpiqeshin t’i përgjigjeshin shqetësimeve të Turqisë, shkruan agjencia kroate e lajmeve, Index.
Ai shtoi se Turqia nuk kërcënon dhe nuk përfiton askënd nga situata aktuale, por foli veçanërisht për mbështetjen e Suedisë për militantët kurdë PKK, të cilët Turqia, Bashkimi Evropian dhe Shtetet e Bashkuara i konsiderojnë organizatë TERR0RlSTE.
Finlanda konfirmoi sot se do të aplikojë për anëtarësim në NATO dhe Suedia pritet ta ndjekë shembullin e njëjtë, në përgjigje të pushtimit rus të Ukrainës. Megjithatë, shqetësimet e Turqisë mund të jenë një pengesë, pasi çdo vendim për t’u anëtarësuar në NATO kërkon miratimin unanim të të 30 vendeve anëtare.
“Këtu duhet të ketë absolutisht garanci sigurie. Ata duhet ta ndalojnë mbështetjen e organizatave terroriste”, u tha Cavusoglu gazetarëve turq në Berlin. Ministri i Jashtëm turk shtoi se Suedia dhe Finlanda duhet ta heqin ndalimin e eksportit të disa produkteve të industrisë së tyre të mbrojtjes në Turqi.
“Pozicioni ynë është krejtësisht i hapur dhe i qartë. Ky nuk është kërcënim, nuk janë negociata në të cilat ne po përpiqemi t’i imponojmë interesat tona”, tha ai. “Ky nuk është as populizëm”, shtoi ai.
Erdogan befasoi NATO-n
Presidenti turk Recep Tayyip Erdogan befasoi aleatët e NATO-s dhe vendet skandinave të premten kur tha se Turqia nuk mund ta mbështesë zgjerimin pasi Finlanda dhe Suedia janë “shtëpia e një numri organizatash terroriste”, por zëdhënësi i tij tha të shtunën se Turqia nuk i ka mbyllur dyert.
Cavusoglu përsëriti se Turqia, e cila u anëtarësua në NATO 70 vjet më parë, nuk është kundër një politike të dyerve të hapura. Ai tha se bisedimet me homologët suedezë dhe finlandezë kanë qenë të mira dhe kanë bërë sugjerime për t’i zbutur shqetësimet e Turqisë.
Ministri i Jashtëm turk vuri në dukje se ai u dha atyre “prova se terroristët jetojnë në vendet e tyre”. Cavusoglu përsëriti mosrespektimin e Suedisë për pozicionin e Ankarasë, duke vënë në dukje se takimet e PKK po mbaheshin në Stokholm gjatë fundjavës.