Mbledhja e sotme e Komisionit për Punë të Jashtme është përcjellë me përplasje të shumta, raporton Gazeta Express.
Fillimisht, përplasje pati në mes të deputetes së Vetëvendosjes, Fitore Pacollit dhe ministres së Punëve të Jashtme, Meliza Haradinajt.
Pas përplasjeve, Pacolli – Haradinaj, fjalën e mori deputeti i LDK’së dhe nënkryetari i Kuvendit, Kujtim Shala.
Deklarimin e tij Shala e nisi duke kritikuar gjuhën e përdorur në mbledhje ku ministrja ishte thirrur që të raportonte për politikën e jashtme.
“Kam tërhequr vërejtjen për tipin e përfaqësimit të subjekteve politike. Kjo është çështje që do të duhej ta bisedonim vetën ne anëtarët. Për anëtarët e qeverisë komisioni ka detyrim që të krijojë kushte që të raportojnë Nuk funksionon kështu komunikimi publik”, ka thënë Shala.
Kësaj deklarate të tij iu është përgjigjur, deputeti nga radhët e Lëvizjes Vetëvendosje, Gazmend Gjyshinca. Një deklaratë e tij u bë edhe shkas që të mbyllej mbledhja e komisionit.
“Dua të lidhem shkurt me profesorin akademikun e nderuar Kujtim Shalën që është edhe deputet. Z. Shala ju jeni profesor edhe e dini rëndësinë e parimit. Pse jemi kaq keq është për shkak të mungesës së parimeve, rri aty…”, kishte thënë Gjyshinca në komision.
“Ti po më kallëzon a”, i është përgjigjur Shala.
Pas këtyre deklaratave, kryetarja e Komisionit për Punë të Jashtme, Time Kadrijaj vendosi për ndërprerje të mbledhjes.
Kadrijaj kritikoi gjuhën e përdorur nga Vetëvendosje në mbledhje të komisionit, duke thënë se në këtë mënyrë po pamundësohet mbajtja e mbledhjeve.
Pak minuta pas përfundimit të mbledhjes, Gazeta Express duke u thirrur në burime ka raportuar se ka pasur përplasje në Kuvend në mes të deputetëve të LDK’së dhe LVV’së.
Këtë e ka mohuar në një përgjigje për Gazetën, Arben Gashi i Lidhjes Demokratike, derisa, nga grupi parlamentar i kësaj partie, përmes një komunikate dënuan gjuhën e përdorur nga Vetëvendosje.
Njejtë ka deklaurar edhe nënkryetari i Kuvendit, Kujtim Shala, megjithatë, tjetër version tregojnë në Lëvizjen Vetëvendosje.
Nga partia e Albin Kurtit kanë lajmëruar policinë për rastin, derisa, në kuvend është parë edhe një autoambulancë.
Deputeti i kësaj partie, Gazmend Gjyshinca tha se ka marrë lëndime trupore pas sulmeve që iu bënë nga Gashi dhe Shala.
“Kjo është procedurë që e ka nisur policia që gjendet në zyrë të grupit, ne do të paraqesim rastin, kam marrë lëndime fizike që janë faktuar si pasojë e goditjeve, ka pasur tentativë që të më gjuajnë drejt hollit të Kuvendit që të qërojnë hesape”, tha ai.