Inspektorati i Komunës së Prishtinës ka gjobitur me 100 euro një qytetare e cila kishte hedhur mbeturinat nga kati i tretë i banesës. Momenti ishte kapur nga kamerat e qytetarëve që kanë lajmëruar organet përgjegjëse.
Dënimin e ka konfirmuar Adonis Tahiri, Drejtor i Inspekcionit në Komunën e Prishtinës. Nëpërmjet Facebookut, ai ka ftuar qytetarët që të vazhdojnë të denoncojë rastet e ngjashme.
“Mbrëmë u publikua një video ku shihet një banore duke hedhur mbeturinat nga dritarja e banesës. Inspektorët e zonës e kanë identifikuar palën, dhe i kanë shqiptuar gjobë në vlerë 100 euro”, shkroi ai.
“Falënderojmë qytetarët për denoncimin publik të rasteve të tilla, dhe për ndihmën që na e japin në identifikimin e shkelësve të ligjeve!’, përfundoi Tahiri.