Ushtruesi i detyrës së presidentit, Glauk Konjufca, ka thënë se nuk e ka pritur që të kundërshtohet ndryshimi i Ligjit për Zgjedhjet dhe se ka pritur konsensus nga partitë tjera.
Ai tha se kundërshtimet që erdhën nga opozita janë tronditëse për mërgimtarët që e kanë pritur një ndërrim të ligjit, njofton Klan Kosova.
“Askush nuk e ka pritur që kundërshtimi i të drejtave të mërgatës sonë të shkojë në këtë nivel që po e shohim. Së paku në këtë çështje kam pritur konsensus të natyrshëm të partive tjera me VV-në. Ky ka qenë njëri prej qëllimeve të kamotshme të secilit: që mërgimtarët tanë të votojnë nëpër ambasadat e konsullatat e shtetit tonë. Çka ka të keqe këtu!? Këto kundërshtime janë tronditëse për mërgimtarët tanë të cilët qe 20 vite e presin këtë vendim të rëndësishëm. Si mund te quhet “kapje e shtetit” një ndryshim që ia mundëson mërgimtarëve tanë një të drejtë të mohuar padrejtësisht?”.
Konjufca ka thënë se s’mund të jetë e ngutshme nisma e tyre kur kjo është iniciativë e cila është ngritur për herë të parë nga VV-ja në Komisionin për Legjislacion në vitin 2014.
“Prej asaj kohe është ngritur e ringritur disa herë. Asnjëherë nuk ka kaluar. Tash mund të kalojë meqë qytetarët kanë votuar për ndryshim”.
Po ashtu, Konjufca mohoi se ndyrhsimi i këtij ligji ka lidhje me zgjedhjen e Presidentes.
“Ky ligj i nevojshëm s’ka lidhje me zgjedhjen e Presidentes. Si mund të thotë LDK-ja që ky Ligj është shantazh për zgjedhjen e Presidentes!? Ajo si parti para pak ditësh zyrtarisht ka marrë vendim që do të qëndrojë në sallë. Ky është një qëndrim shumë i pjekur e racional në përpjekje për stabilitetin institucional të Kosovës të cilin e përshëndesim. Të drejtat e domosdoshme të mërgatës sonë nuk janë shantazh për askënd. Është për të mirën e popullit tonë që jeton jashtë Kosovës”.
Kryeparlamentari tha se nëse shkohet në zgjedhje atëherë fajtorë janë ata 40 deputetë që do të mungojnë në seancë.
“Gjithçka është e qartë: Kosova shkon në zgjedhje vetëm dhe VETËM nëse ata të cilët mungojnë në seancën e zgjedhjes së Presidentes janë më shumë se 40. Vetëm ATA e marrin përgjegjësinë e zgjedhjeve të reja dhe askush tjetër. Ata të cilët e duan shtetin dhe republikën më shumë se veten, i kanë 3 opsione: a) e votojnë Vjosën; b) e qesin kundërkandidatin e tyre dhe e votojnë atë; c) votojnë kundër Vjosës. Kurse ata që duan bojkot e obstruksion – vetëm ata duan zgjedhje në Kosovë. E qartë si drita e diellit”.