Këtë të martë Bashkimi Europian reagoi sa i takon vendimit të Kosovës që të hapë ambasadën e saj në Jerusalem.
BE e konsideron Jerusalemin me një status të pazgjidhur, kjo është dhe arsyeja se pse ka shprehur keqardhje për vendimin e Kosovës.
Zëdhënësi i Bashkimit Europian, Peter Stano në një konferencë për media pohoi se Brukseli pret nga Kosova që të ndërmarrë veprime në bazë të deklarimeve për integrimet europiane, dhe jo vendime që e largojnë Kosovën nga qëndrimet e BE-së.
“Në përgjithësi është gjithmonë e mirëseardhur kur parterët tanë të jashtëm normalizojnë raportet mes tyre. Por kur është fjala për hapjen e ambasadës në Jerusalem, ky është një vendim për keqardhje i Kosovës sepse e largon Kosovën nga qëndrimet e BE-së për statusin e Jerusalemit. Të gjitha ambasadat e vendeve anëtare të BE-së dhe delegacioni i BE-së janë në Tel Aviv dhe kjo është në përputhje me rezolutën e Kombeve të Bashkuara dhe vendimet e Këshillit të BE-së. Statusi i Jerusalemit si kryeqytet i të dyja shteteve është qëndrim i BE-së, i cili nuk ka ndryshuar,” – tha Stano.
Pak ditë më parë në një mesazh në rrjetin social Facebook ministrja e Jashtme e Kosovës Meliza Haradinaj Stublla u ndal jo vetëm tek historia dhe mbështetja mes dy popujve, por duke vlerësuar se njohja nga Izraeli është në nga arritjet më të mëdha të Kosovës dhe një epoke e re për raportet dypalëshe.