Në objektin e paraburgimit në Hagë po qëndrojnë shtatë ish-udhëheqës të Ushtrisë Çlirimtare të Kosovës, të cilët po akuzohen për krime lufte, vrasje dhe trajtim mizor të njerëzve.
Por, se a po qëndrojnë ata bashkë në një dhomë, ka treguar për Gazetën Express një familjare e sekretarit të OVL-UÇK-së, Nasim Haradinaj.
Ajo tha se ata nuk qëndrojnë në një dhomë, por në një kohë të caktuar e kanë të lejuar të shihen me njëri-tjetrin në një kuzhinë e cila gjendet në atë objekt. Aty ata po ashtu përgatitin ushqimet të cilat kanë mundësi t’i përgatisin edhe vetë.
Nasim Haradinaj, Hysni Gucati dhe Sali Mustafa kanë mundësi që të përgatisin ushqime tradicionale, por të gjitha me shpenzimet e tyre.
Anipse kushtet janë të mira, të gjitha këto paguhen nga vetë anëtarët e OVL-UÇK-së. Kështu ka treguar për Express familjarja e Nasim Haradinajt.
Ajo tha se Haradinaj madje u kishte përgatitur edhe fasule dhe pulë të pjekur.
Anipse këta të fundit kanë të drejtën që të shihen me njëri-tjetrin, megjithatë nuk mund të shihen me Hashim Thaçin, Kadri Veselin, Jakup Krasniqin dhe Rexhep Selimin, pasi këta të fundit janë në vëtizolim për shkak të COVID-19.
Ata nuk do të takohen me njëri-tjetrin edhe 10 ditë, pasi t’i bëjnë dy javë që janë vendosur në objektin e Dhomave të Specializuara në Hagë.
Gucati e Haradinaj janë arrestuar nga EULEX-i me datën 25 shtator, në Prishtinë. Po atë ditë, ata u transferuan në objektin e paraburgimit të Dhomave të Specializuara të Kosovës në Hagë.
Ndaj tyre është lëshuar fletarrestim për vepra penale kundër administrimit të drejtësisë, përkatësisht për frikësim të dëshmitarëve, hakmarrje dhe shkelje të fshehtësisë së procedurës, të parapara në Kodin Penal të Kosovës.
Ndërsa, më 5 nëntor janë konfirmuar aktakuzat ndaj Thaçit dhe Veselit, të cilët janë dërguar po ashtu në Hagë.
Por, bastisje dhe arrestim ka pasur më 4 nëntor ndaj Jakup Krasniqit, i cili pas 8 orësh bastisje në shtëpinë e tij, ai u arrestua dhe u dërgua në objektin e Dhomave të Specializuara.