Kosova duhet të pranohet në NATO si përgjigje për pushtimin rus të Ukrainës, ka kërkuar një ligjvënës amerikan në letrën drejtuar presidentit të Shteteve të Bashkuara të Amerikës, Joe Biden.
Në letrën drejtuar Bidenit dhe Sekretarit Antony Blinken, kongresisti Ritchie Torres ka thënë se Kosova është aleat i mirë i Kosovës dhe duhet t’i bashkohet NATO-s për të kundërshtuar ndikimin rus në rajon.
“Më 27 shkurt, ministri i Mbrojtjes i Kosovës, Armend Mehaj, bëri thirrje për ‘pranim të përshpejtuar në NATO’.
Për më shumë, më 3 mars, Parlamenti i Kosovës miratoi një rezolutë që i kërkon Qeverisë të nisë negocimin për pranim në NATO.
S’mund të pajtoheshim më shumë me këto veprime”, ka shkruar në letrën e tij Torres.
“Përderisa Rusia vazhdon të sillet si akter irracional dhe Serbia po i forcon raportet me Rusinë, është kyçe që të ndihmojmë aleatin tonë, Kosovën, t’i bashkohet NATO-s.
Me zhvillimet e shpejta të situatës së sigurisë në Evropë, duhet të qëndrojmë me aleatin tonë”.
Teksa ka shpërndarë një artikull për letrën Bidenit, Torres ka shkruar në Twitter se SHBA-ja s’ka aleat më të mirë se Kosovën në Evropën juglindore.
Ai ka shtuar se Kosova është ndër shtetet e para që pranoi refugjatët afganë dhe se tani është koha që Kosova të pranohet në NATO.