Ministri i Jashtëm kroat, Gordan Grlić Radman vlerëson se situata në Ballkanin Perëndimor po përkeqësohet dhe njofton për një “përgjigje të detajuar” nga BE-ja për këtë.
“Incidentet e fundit në Malin e Zi dhe në kufirin midis Kosovës dhe Serbisë janë shkak për shqetësim serioz. Situata në Ballkanin Perëndimor po përkeqësohet”, tha Grlić Radman.
Ai theksoi se situata po përkeqësohet edhe në Bosnjë e Hercegovinë, ku në vend që të arrihej një konsensus mbi reformën zgjedhore, pati një “përshkallëzim në skenën e brendshme politike dhe paralizë të institucioneve”.
Duke ardhur në takimin e Këshillit të Ministrave të Jashtëm të BE -së, kreu i diplomacisë kroate njoftoi se Këshilli duhet të japë një “përgjigje të detajuar” për situatën në Ballkanin Perëndimor deri në takimin e ardhshëm në nëntor.
Në takimin e sotëm të Këshillit të BE-së, Përfaqësuesi i Lartë, Joseph Borrell do t’i informojë ministrat mbi zhvillimet e fundit në Ballkanin Perëndimor.
Ministrat e jashtëm të BE-së do të miratojnë përfundimet në një takim në Luksemburg sot mbi BeH dhe Operacionin Altea të BE-së, i cili mbikëqyr zbatimin e Marrëveshjes së Dejtonit.