Ministrja e Jashtme e Gjermanisë, Analena Baerbock, ka kërkuar nga Bashkimi Evropian që të vendosen sanksione ndaj Millorad Dodikut, kryetarit të Republikës Srpska të Bosnje e Hercegovinës.
Përpjekjet e fundit të Dodikut dhe asamblesë së Republikës Srpska, e cila ka miratuar një sërë hapash që fuqizojnë një nismë për të transferuar disa kompetenca nga institucionet shtetërore, pavarësisht paralajmërimeve nga Perëndimi, ka bërë që BE të reagojë.
Qeveria e re gjermane i bëri thirrje të hënën Bashkimit Evropian që të vendosë sanksione ndaj anëtarit të Presidencës së BiH dhe kreut të SNSD Milorad Dodik, i cili synon “të tërheqë Republikën e tij autonome Republikën Srpska nga Forcat e Armatosura, gjyqësori dhe sistemi i taksave të BiH”, njofton Reuters.
“Përpjekjet për t’u shkëputur janë të papranueshme, dhe kjo gjithashtu do të thotë, dhe unë kam lobuar këtu, se regjimi aktual i sanksioneve tani të përdoret edhe kundër z. Dodik,” u tha gazetarëve Ministrja e Jashtme gjermane Annalena Baerbock pas takimit me kolegët e BE-së në Bruksel.
Ajo përsëriti komentet e paraardhësit të saj, Heiko Maas, një ditë përpara se ministrat e çështjeve evropiane të BE-së të diskutonin situatën në Bosnje dhe Herzegovinë.
Udhëheqësit e BE-së do të diskutojnë situatën në Ballkan në mënyrë më të detajuar në një samit me fqinjët lindorë të bllokut të mërkurën.
Ndryshe, Baerbock është kryetarja e Partisë së Gjelbër e cila tani është në koalicion me SPD-në në Gjermani. Në këtë parti bën pjesë edhe eurodeputetja, Viola von Cramon.
“The situation in #BosniaHerzegovina is worrying, efforts to secede are unacceptable. For me, this means that the existing sanctions regime should now also be used against Mr Dodik.” – Foreign Minister @ABaerbock after today’s Foreign Affairs Council. #FAC pic.twitter.com/o9dwUP0JHM
— Germany in the EU (@germanyintheeu) December 13, 2021