Kryeministri i vendit, Albin Kurti, bashkë me Ministrin e Kulturës, Hajrulla Çekun e Këshilltarën Politike, Ardita Sinanin, takuan përfaqësuesit politikë të komunitetit boshnjak e shqiptar që jetojnë në Serbi.
Pjesë e delegacionit ishin Sulejman Ugljanin, nga SDA Sanxhak, deputeti shqiptar në kuvendin e Serbisëm Shaip Kamberi, e dy deputetë tjerë, Enis Imamoviq e Selma Kuçeviq, ku e njoftuan Kurtin për brengat e problemet me të cilat ata po ballafaqohen.
Sipas njoftimit, me përfaqësuesit shqiptarë e boshnjakë u diskutua për elementet përbërëse të propozimit evropian për normalizimin e raporteve në mes Kosovës e Serbisë, ku i gjithë delegacioni kërkoi reciprocitet të të drejtave me serbët në Kosovë.
“Të drejtat e komuniteteve joshumicë në shtetet tona pasqyrojnë demokracinë dhe zhvillimin tonë si shoqëri. Për dallim nga Serbia që nga Freedom House klasifikohet si shtet me regjim hibrid, Republika e Kosovës është shtet demokratik me të drejta dhe liri për të gjithë, theksoi Kryeministri Kurti. Ai shtoi se komunitetet e ndryshme pa dallim duhet të trajtohen në kuadër të principeve universale e në harmoni të plotë me standardet e Bashkimit Evropian”.
“Tre deputetët në Kuvendin e Serbisë që pranojnë Kosovën e pavarur, Enis Imamovic, Selma Kucevic dhe Shaip Kamberi, së bashku me Dr. Sulejman Ugljanin, potencuan që janë të pakënaqur me statusin e boshnjakëve dhe shqiptarëve në përgjithësi e posaçërisht në komunat e Novi Pazarit, Tutinit e Sjenicës në Sanxhak si dhe të Preshevës, Medvegjës e Bujanocit në Luginë. Ata kërkuan reciprocitet të të drejtave me serbët në Republikën e Kosovës”, thuhet në njoftimin e qeverisë.
Më tej, në njoftim thuhet se palët në takim u pajtuan për paqe të qëndrueshme dhe siguri në Ballkanin Perëndimor, ku duhet të ketë simetri të drejtash dhe jo qasje privilegjuese ndaj një pakice.