Kryeministri i Polonisë, Mateusz Morawiecki, i është drejtuar presidentit të Francës, Emmanuel Macron, këtë mëngjes, duke i thënë “Sa herë keni negociuar me Putinin dhe çfarë keni arritur”?
Sipas Agence France-Presse, Morawiecki u shpreh: Ne nuk diskutojmë, nuk negociojmë me kriminelë. Kundër kriminelëve duhet luftuar. Askush nuk negocioi me Hitlerin. A do të negocionit me Hitlerin, me Stalinin?
Morawiecki bëri thirrje për hetim mbi veprimet ruse në Ukrainë dhe për zbatimin e sanksioneve të mëtejshme.
“Këto masakra të përgjakshme të kryera nga rusët, nga ushtarët rusë, meritojnë të quhen siç janë. Ky është gjenocid dhe duhet gjykuar”, u tha Moraëiecki gazetarëve.
“Kjo është arsyeja pse ne po propozojmë një komision ndërkombëtar për të hetuar këto krime. Një komision i tillë “është thelbësor nëse duam të zbulojmë të vërtetën mbi shtrirjen e krimeve fashiste ruse”.
“Sanksionet janë të nevojshme. Ato që janë vendosur nuk po funksionojnë”, tha Morawiecki.
Ai gjithashtu kishte një mesazh për kancelarin gjerman, Olaf Scholz, në lidhje me sanksionet ekonomike.
Morawiecki tha: “Nuk janë zërat e liderëve gjermanë të biznesit, të miliarderëve gjermanë që ndoshta po ju ndalojnë të ndërmerrni veprime, që duhen dëgjuar sot në Berlin, por zërat e grave dhe fëmijëve të pafajshëm.”