Kryeministri i Kosovës, Albin Kurti, i ka vazhduar takimet në SHBA me kongresistë e politikanë të ndryshëm. Ai sot e ka takuar edhe kongresistin amerikan, Mondaire Jones, me të cilin kanë biseduar edhe për sigurinë në rajon pas fillimit të luftës në Ukrainë.
Kurti gjatë takimit ka përsëritur kërkesën e Kosovës që kampi ushtarak në “Bondsteel” të kthehet në bazë të përhershme ushtarake të SHBA-së në Republikën e Kosovës.
“Kryeministri vuri theksin te kërcënimi për sigurinë e Kosovës dhe rajonit që mund t’i vijë nga aleanca ushtarake e Serbisë me Rusinë dhe përsëriti kërkesën që kampi ushtarak “Bondsteel” që ndodhet në Kosovë, të kthehet në bazë të përhershme ushtarake të Shteteve të Bashkuara të Amerikës”, thuhet në njoftimin e Zyrës për Media të Kryeministrisë.
Pleasure to meet @RepMondaire Jones, one of Congress's leading voices for progressive change. We discussed the threat that the Russia-Serbia military alliance poses to Kosova's security, and our efforts to create high-paying, sustainable jobs by attracting US investors to Kosova. pic.twitter.com/CqMFh7Y2G2
— Albin Kurti (@albinkurti) May 21, 2022
Kurti e ka njoftuar kongresistin Jones për përpjekjet dhe angazhimin për të tërhequr investime, veçanërisht nga Shtetet e Bashkuara të Amerikës, dhe për të krijuar vende pune të qëndrueshme dhe të mirëpaguara në Kosovë.
“U diskutua për sigurinë në kontinentin e Evropës pas agresionit ushtarak rus në Ukrainë dhe rrezikun që ndikimi rus në Ballkanin Perëndimor paraqet për paqen dhe stabilitetin në rajon”, thuhet në komunikatë.