Kryeministri në detyrë i Kosovës, Albin Kurti, ka reaguar pas shembjes së Teatrit Kombëtar të Tiranës.
Mëngjesin e së dielës autoritetet kanë shembur Teatrin Kombëtar në Tiranë.
Pas shembjes së tij ka reaguar edhe kryeministri në detyrë i Kosovës, Albin Kurti, shkruan lajmi.net.
Përmes një postimi në profilin e tij zyrtar në rrjetin social Facebook, Kurti ka shkruar se duhet ta mbrojmë kulturën tonë në çdo cep dhe jo ta shkatërrojmë atë.
Sipas Kurtit, arkiva e një populli duhet të mbahet e paprekur nga gjerimet dhe siç u shpreh ai, kultura është krijuar nëpër historitë e regjimeve, por në thelb të saj është krijimtaria dhe aderimi i një populli.
“Kur shembet një monument kulture, kjo nuk ndodh si pasojë e një gjykimi të pjesshëm, që vjen prej shijes së veçantë të dikujt, por prej interesave të përkohshëm që lidhen me përfitimet e disave”, ka shkruar Kurti ndër të tjerash.
Reagimi i plotë i Kurtit, pa ndërhyrje:
Ne duhet të jemi mbrojtësit e çdo cepi të kulturës sonë.
Një pjesë e saj na është vjedhur nga pushtuesi serb – 1.200 artefakte kulturore të Kosovës.
Një pjesë tjetër na është shtypur e ndrydhur nga diktatura e ideologji, na është sulmuar nga akademitë e fqinjëve, na është shitur e rrënuar prej paditurisë zyrtare a korrupsionit institucional.
Arkiva e një populli, kujtesa e tij, duhet të mbahet e paprekur nga regjimet. Kultura është krijuar nëpër historitë e regjimeve, por në thelb të saj është krijimtaria dhe aderimi i një populli.
Kur shembet një monument kulture, kjo nuk ndodh si pasojë e një gjykimi të pjesshëm, që vjen prej shijes së veçantë të dikujt, por prej interesave të përkohshëm që lidhen me përfitimet e disave.
I përshëndes dhe i mbështes tërë artistët dhe qytetarët e Tiranës që e mbrojtën kaq gjatë Teatrin Kombëtar. Kur ndodhin humbje, ngjarjen sa edhe vetë humbja, e shënon në histori rezistenca. Në rezistencë mësojmë, e meqë nuk i harrojmë ato mësime, ata që sot përfitojnë, nesër humbin, kurse ata që humbin fitojnë./Kosova ime