Kryeministri i Kosovës, Albin Kurti, e ka komentuar çështjen e Manastirit të Deçanit, duke e vlerësuar çështjen e dhënies së tokave të këtij manastiri si “vendim të regjimit të Millosheviqit”.
Kurti këto deklarata i ka dhënë në një intervistë për RTK-në teksa tha se ka dyshime edhe për vendimin e Gjykatës Kushtetuese për dhënien e 24 hektarëve Manastirit të Deçanit.
“Unë e kuptoj që Manastiri i Deçanit duhet të ketë një hapësirë, unë e kuptoj që kanë nevojë për qetësinë e ambientit, ndihmën e Qeverisë së RKS-së, mirëpo ne kemi rezervën e zakonshme për vendimet e regjimet e Millosheviqit, të cilat për bindjen time janë pranuar nga Gjykata Kushtetuese, e cila e ka trajtuar një lëndë pa kaluar në faza të zakonshme.
Me ç’rast nuk duam t’i dominojmë, por në të njëjtën kohë besoj se duhet të hasim në mirëkuptimin e tyre, se vendimet e regjimit të Millosheviqit nuk mund të jetojnë në shekullin tonë”, ka thënë ai.
“Ne nuk mund të kthehemi as para vitit 1999, e as para 2008 e 2012, kur është hequr mbikëqyrja e pavarësisë së Kosovës.
Këto janë gjëra të cilat kanë ndodhur në të kaluarën, jemi këtu ku jemi dhe çfarëdo përpjekje për t’u kthyer në të kaluarën unë besoj që nuk mund të ketë të ardhme”, deklaroi më tej kreu i ekzekutivit.