Emërimi i Miroslav Lajçakut si emisar për dialogun Kosovë-Serbi nuk ishte pritur mirë para dy vjetëve në Prishtinë.
Që nga ajo kohë diplomati sllovak u pa të ketë ndryshuar qasje në total.
Tani ai flet për integritetin e Kosovës, kushtetutshmërinë e saj e thotë se dialogu me Beogradin në asnjë formë nuk është për statusin e shtetit kosovar.
Njohësja e procesit të dialogut, Donika Emini, thotë se arsye për këtë ndryshim të Lajçakut është ndikimi që e ka te ai dhe te krejt BE-ja emisari amerikan, Gabriel Escobar.
Dyshja euro-amerikane për tri ditë qëndroi në Kosovë.
Në këtë vizitë jo, por në një debat të mbajtur vitin e kaluar, i dërguari i posaçëm kishte thënë se ujdia finale me Serbinë do t’i jepte atij arsye të fortë për të shkuar në Sllovaki e të kërkojë njohjen e Kosovës.
Sllovakia, bashkë me Spanjën, Greqinë, Qipron e Rumaninë janë pesë shtetet anëtare të BE-së që nuk e pranojnë pavarësinë e Republikës së Kosovës.
Mandati aktual që e ka si i dërguar i posaçëm për dialogun dhe çështjet tjera në Ballkanin Perëndimor, Lajçakut i përfundon në gusht të këtij viti.