Gjatë 24 orëve të kaluara, nga koronavirusi në Britani kanë vdekur 697 persona. Shifra e përgjithshme e viktimave në vendin ishullor shkoi në 11,309 persona. Kjo është dita e dytë me radhë që numri i viktimave brenda 24 orëve po shënon rënie.
Rënia e numrit të viktimave erdhi një ditë pasi Mbretëria e Bashkuara e arriti shifrën e përgjithshme prej 10 mijë viktimave, e cila më parë ishte shënuar vetëm në Shtetet e Bashkuara, Itali, Spanjë dhe Francë.
Organet e shëndetit publik në Angli bënë të ditur se viktimat ishin nga mosha 17 deri 101-vjeçare dhe se 40 prej tyre nuk kishin ndonjë problem tjetër shëndetësor, shkruan “Daily Mail”, transmeton Gazeta Express.
Shifra e viktimave për 24 orët e kaluara është më e ulët se ajo që u publikua një ditë më parë dhe më e vogla që nga e hëna e kaluar.
Ministrja e Parë e Skocisë, Nicola Sturgeon, tha se ka shenja optimiste se masat kundër koronavirusit janë duke funksionuar, por ato do të vazhdojnë të mbeten në fuqi.
Me koronavirus është infektuar edhe kryeministri britanik, Boris Johnson. Ai qëndroi për disa ditë në kujdes intensiv para se të lirohej nga spitali të dielën.