Kryetari i Lidhjes Demokratike të Kosovës, Lumir Abdixhiku i ka reaguar kryeministrit të Kosovës, Albin Kurtit për dokumentet e dialogut Kosovë-Serbi.
Abdixhiku përmes një shkrimi në facebook, thotë se ‘dosja e kaltër’ që pason me dorështrëngim nga Avdullah Hoti ishte me dokumente të dialogut.
Ai i thotë se aty janë 29 faqe raport dhe dokumentet e dakorduara në secilin takim.
Abdixhiku tutje shton se nëse nuk i mban mend kryeministri ka mundur të pyes, ndërsa nëse i ka humbur ka mundur t’i kërkoj sërish.
Postimi i plotë i kreut të LDK-së:
Kryeministër,
Të bësh politikë është një gjë. Të bësh viktimën kur s’je i tillë është e panevojshme – është dobësi.
Dokumentet e dialogut të janë dhënë ditën e pranimit të detyrës. Është ajo dosja e kaltërt që pason me dorështrëngim nga paraardhësi yt. Aty i ke 29 faqe raport. I ke edhe dokumentet e dakorduara në secilin takim. E ke pozicionin politik të Kosovës, e analizën e ekspertëve – të njëjtëve që i ke angazhuar tani për konsultim.
Nëse s’i mbanë mend, ke mundur të pyesësh. Nëse i ke humbur, ke mundur t’i kërkosh sërish.
Nëse të janë dashur informata shtesë nga njerëzit e mi në LDK, jemi pesë minuta larg në Prishtinë. S’jemi të huaj kur është në pyetje vendi. E duam barabartë të gjithë.
Ke mundur ta bësh secilin hap ndryshe përveç ankimit para miqve jashtë. Trego përgjegjësi. S’je më opozitë. Tani je Kryeministër. Udhëheq si i tillë.