Kryetari i Lidhjes Demokratike të Kosovës, Lumir Abdixhiku, ka prezantuar profilin e nënkryetares së re të këtij subjekti politik, Shqipe Mjekiqi.
Abdixhiku, nëpërmjet ‘Facebook’-ut, ka njoftuar se Mjekiqi është ligjëruese universitare, si dhe ka doktoruar në fushën e shkencave politike në ‘Trinity College’ në Dublin.
“Një ligjeruese univeristare; bashkëpunëtore e jashtëzakonshme, nënë e dy fëmijëve – Shqipja, nga sot, pasuron rradhët tona politike në aktivitetin e bollshëm që na pret përpara. Ajo mbetet motiv i aktivizimit politik për të rinjtë e të rejat e për profesionistët e vendit tonë”, thuhet në postimin e kreut të LDK’së.
Mjekiqi ka qenë këshilltare e Fatmir Sejdiut gjatë kohës sa ka qenë president i Kosovës dhe këshilltare e Skënder Hysenit, gjatë kohës sa ky i fundit ka drejtuar Ministrinë e Punëve të Brendshme.
Nënkryetarët e tjerë të përzgjedhur sot në mbledhjen e mbajtur nga LDK’ja, me propozim të Abdixhikut, janë edhe Lutfi Haziri, Anton Quni dhe Gazmend Muhaxheri.
Postimi i plotë i Abdixhikut:
Shqipe Mjekiqi, e doktoruar në fushën e shkencave politike në Trinity College në Dublin, nga sot do të jetë pjesë e Lidhjes Demokratike të Kosovës.
Shqipja i ka të përfunduara studimet bazike në Universitet të Prishtinës, ndërsa ka kryer studimet postdiplomike në London School of Economics (LSE) në Britani të Madhe. Si pjesë e kualifikimit të saj akademik, Shqipja ka studiuar ndikimin e sistemeve zgjedhore në sjelljen legjislative nëpër shtetet evropiane.
Një ligjeruese univeristare; bashkëpunëtore e jashtëzakonshme, nënë e dy fëmijëve – Shqipja, nga sot, pasuron rradhët tona politike në aktivitetin e bollshëm që na pret përpara. Ajo mbetet motiv i aktivizimit politik për të rinjtë e të rejat e për profesionistët e vendit tonë.
Mirë se vjen.