Nënkryetari i LDK’së, Lutfi Haziri, ka folur rreth asaj se a ka ardhur koha që të ndërrohet lideri i LDK’së.
Për Euronews Albania, Haziri ka thënë se nëse nuk tregohet rezultat në zgjedhjet e 14 shkurtit, Avdullah Hoti dhe lidershipi i LDK’së duhet ta marrin përgjegjësinë.
“Me të thanë të drejtën në Kosovë është duke u debatu shumë kjo çështje.
Mendoj që përkundër që PDK po hyn në këtë garë pa liderin e saj partiak dhe atë shpirtëror, unë besoj që përgjegjësinë politike duhet ta marrin ata që garojnë.
Nëse nuk tregohet një rezultat në më 14 shkurt, lidershipi i LDK’së dhe z. Hoti, duhet ta marrin përgjegjësinë në një proces pas-zgjedhor, duhet të hapin rrugë politikisht, në mënyrë që LDK ta bëjë rikthimin e madh”, ka thënë Haziri.
Nënkryetari i LDK’së ka theksuar se ky proces zgjedhor do të shpërfaq nevojën që partitë ta shohin rolin e tyre në një dekadë të ardhshme.