Ministrja e Jashtme dhe e Diasporës, Meliza Haradinaj-Stublla, ka kritikuar paraardhësin e saj Glauk Konjufcën dhe partinë e tij se kanë dëmtuar lidhjet e Kosovës me miqtë ndërkombëtarë.
“Gjuhën degraduese e ka instaluar Vetëvendsoje. Gjuha e përdorur ndaj SHBA-së ka qenë më e ashpër se ndaj Serbisë. Vetëvendosje ka akuzuar SHBA-në dhe ambasadorin Grenell për thika mbi harta, ndërsa Serbisë i është hequr taksa. Është treguar mirëbesim ndaj Serbisë, por jo edhe ndaj SHBA-së. Kjo nuk besoj se reflekton ndaj pritjeve të qytetarët të Kosovës ndaj SHBA-së. Gjithë kjo narrativë inflamatore e ka përcjellë Vetëvendosje dhe etapat e saj”.
Përpos këtyre akuzave, Hardinaj-Stbulla në Rubikon të Klan Kosovës tha se veprimi i Konjufcës për të tërhequr diplomatët nga misioni është e papranueshme.
Megjithatë, ajo u pajtua se ka pasë diplomatë që kanë punuar kundërligjshëm dhe të tillë që iu ka kaluar afati dhe është dashur të kthehen.
“Secili diplomat e di që kur duhet të shkojë dhe të kthehet sipas kalendarit. Është e vërtetë që ka diplomatë që e kanë kaluar afatin e tyre dhe duhet të kthehen. Por, ka pasë edhe vendime selektive nga Konjufca. Qëllimisht është defunksionalizuar misioni ynë në SHBA, e po ashtu edhe misioni në Hagë. Ndoshta kanë pasë qëllim të dërgojnë njërz të tyre, edhe pse s’e kanë bërë, por e kanë lëvë vendin të zbrazur në kohën kur njerëzit tanë po shkojnë në Hagë. Pa asnjë arsye e kanë lënë misionin hapur. E them qëllimshëm sepse kanë pasë interesa të caktuara. Narrativa e tyre ka qenë kundër njerëzve të UÇK-së. Ka qenë esenciale të kemi një trupë diplomatike”.
Haradinaj tha se këto vendime nuk i ka hedhur poshtë por i ka pezulluar për një afat të caktuar pasi që mendon se kanë qenë vendime jolegjitime të marra nga një ministër i shkarkuar.
Ndërkaq, për mbledhjen e parë të Komisionit për Punë të Jashtme ku Haradinaj-Stublla e kishte raportimin e parë, ajo tha se i vjen keq për atë që ndodhi dhe se qytetarët nuk duhet të dëgjojnë lajme të tilla.
Por, kryediplomatja tha se nuk ka qenë prezente në sulmin që po pretendojnë deputetët e Vetëvendosjes nga kolegët e tyre të LDK-së.
“Unë kam dalë nga salla, por flitet se ka ndodhë një skenë e tillë që s’e kam parë. Nuk mund të flas për diçka që s’kam qenë prezente. Para meje ka ndodhur fyerje verbale gjatë fjalimit tim, por edhe ndërmjet”.