Parlamenti votoi sot shkarkimin e presidentit Ilir Meta me 104 vota pro, 7 kundër dhe 3 abstenim.
Çështja pritet të shkojë në Gjykatën Kushtetuese dhe për të folur më hollësisht mbi këtë, Euronews Albania ftoi në studio juristin Dardan Mustafaj.
Juristi Mustafaj tha se çështja do të mbërrijë pranë Gjykatës Kushtetuese pas pesë ditësh dhe se presidenti Meta është në një pozitë të favorshme procedurale.
“Brenda pesë ditëve çështja do të shkojë pranë Gjykatës Kushtetuese. Gjykata Kushtetuese është e përbërë nga shtatë anëtarë dhe presidenti është në një pozitë më të favorshme procedurale sesa për mos shkarkimin e tij. Duhen pesë vota për ta shkaktuar. Nëse nuk realizohen pesë vota, kërkesa konsiderohet se rrëzohet”, u shpreh Mustafaj.
Dardan Mustafaj tha se vendimi i sotëm është vetëm një hap në procedurën që mund të çojë në shkarkimin e Metës.
“Ai është aktualisht në detyrë dhe ka kompetenca të plota. Nuk ndryshon asgjë”, tha Mustafaj.
Ai tha se shkaqet e ngritura nga Parlamenti për shkarkimin e presidentin nuk kanë të bëjnë me akte antikushtetuese të këtij të fundit, por me sjelljen dhe retorikën e tij.
“Shkaqet që ka ngritur Parlamenti, janë shkaqe që kanë të bëjnë me mënyrën se si presidenti është shprehur ose është sjellë, por jo me akte apo veprime konkrete që mund jenë përkthyer në dekrete apo në vendime që kanë shkelur drejtpërdrejtë Kushtetutën”, u shpreh Dardan Mustafaj.
Gjykata Kushtetuese ka afat dy muaj për të shqyrtuar çështjen, mirëpo duke parë interesimin e Parlamentit për shkarkimin e tij, atëherë shqyrtimi mund të përshpejtohet, sipas juristit.
“Gjykata Kushtetuese do ta nisë shqyrtimin menjëherë por nuk është se ligji organik për GJK parashikon afate specifike për këtë lloj kërkese. Gjykata Kushtetuese ka parimisht dy muaj për ta shqyrtuar këtë kërkesë. Duke parë gjendjen dhe interesimin, besoj se Gjykata Kushtetuese në mos do ta respektojë këtë afat, do të tregohet edhe më e shpejtë në gjykimin e kësaj çështjeje. Vetë gjyqtarët vendosin nëse mund t’i japin përparësi apo jo. Gjykata Kushtetuese mund të marrë vendime në urgjencë edhe brenda një dite”, tha Dardan Mustafaj.
Mustafaj sqaroi më tej se dy muaj është afati për të marrë një vendim paraprak nëse çështja kalon në seancë apo jo dhe nëse kalohet në seancë, nevojitet koha e nevojshme për të realizuar seancën e cila sipas ligjit, duhet të jetë publike.
Tutje theksoi se vendimi i sotëm me atë raport votash pro nuk do të ishte marrë nëse Parlamenti nuk do të kishte këtë përbërje, nga ku mungojnë deputetët e opozitës që dorëzuan mandatet.