Rektorët e universiteteve publike të Kosovës kanë mbajtur gjatë ditës së djeshme një mbledhje të jashtëzakonshme ku kanë diskutuar për rrjedhën e arsimit të lartë në Kosovë, veçanërisht për presionin e shantazhet e MASHT-it ndaj universiteteve publike, shkruan Gazeta Express.
Në një komunikatë nisur për media, nga konferenca e rektorëve të universiteteve publike në Kosovë këta të fundit reagojnë ndaj një letre që ministri Shyqiri Bytyqi, i kishte drejtuar rektorit të Ferizajt, Agron Bajraktari.
“Diskursi i përdorur në këtë shkresë është për keqardhje dhe dëshmi se sa kanë degraduar politikat arsimore në qeverinë e Kosovës dhe sa kanë devijuar partititë politike në trajtimin e arsimit e të kuadrove të arsimit”, shkruhet në letër, derisa, tutje, theksohet se kjo nuk është hera e parë që ministri i tejkalon kompetencat e veta.
Nga konferenca e rektorëve kanë thënë se ndërhyrjet e ministrit të Arsimit i dëmtojnë përpjekjet për ngritje të cilësisë në arsim.
Ndyshe, me datë 11 nëntor, ministri Bytyqi i është drejtuar me një letër rektorit të Ferizajt, Agron Bajraktari, ku ka shkruar se janë të shqetësuar dhe të shokuar nga sjellja të cilën e ka quajtur të papërgjegjshme për zgjedhjen e organeve udhëheqëse në universitet.
“Tejkalimi juaj është skandaloz, si për kërkimin e CV-së nga të emëruarit e Ministrit, po ashtu edhe për kërkesën për planin strategjik para konsolidimit të organeve të Këshillit Drejtues”, thuhet në letrën dërguar nga Bytyqi.
Bajraktari do t’ia kthente një ditë më vonë këtë letër Bytyqit, e ndër të tjera aty kishte folur edhe për gjuhën e përdorur nga ministri.
