Gjatë kohës sa ishte kryeministër i Kosovës, Avdullah Hoti në Pakon e Rimëkëmbjes Ekonomike kishte paraparë edhe tërheqjen e 10 përqind nga kursimet pensionale në Trust.
Qeveria Hoti asokohe prezantoi programin për Rimëkëmbje Ekonomike pas pandemisë, i cili synonte ofrimin e mbështetjes për sektorin privat dhe kompensimin e humbjeve të shkaktuara nga pandemia.
Në një seancë të jashtëzakonshme të thirrur nga Partia Demokratike e Kosovës, Kuvendi i Kosovës pati miratuar Ligjin për Rimëkëmbjen Ekonomike me 72 vota për, asnjë kundër dhe asnjë abstenim.
Një ndër nenet e këtij ligji ua mundësoi qytetarëve të tërheqin në mënyrë të parakohshme deri në 10 përqind të mjeteve të kursyera në Fondin e Kursimeve Pensionale të Kosovës (Trust).
Pas lejimit që qytetarët të mund të tërheqin paratë nga Fondi i Kursimeve Pensione, tërheqja e tyre kapi shumën e mbi 197 milionë eurove. Fondi i Kursimeve Pensionale të Kosovës (FKPK) asokohe kishte nën menaxhim 2,140,991,440 euro.
Numri i llogarive të hapura që nga fillimi është 700,975 kurse aktualisht janë 365,954 llogari aktive.
E nga tërheqja e këtyre parave duket se duan të përfitojnë sërish qytetarët.
Shumë prej tyre veçse janë shprehur pro propozimit për një tërheqje tjetër të mjeteve të mbledhura në kuadër të Fondit të Kursimeve Pensionale në Kosovë.
E pavarësisht se gjatë kohës së qeverisjes pati propozuar vetë një vendim të tillë, tani ish-kryeministri Avdullah Hoti, e cilëson si jo të nevojshme edhe një tërheqje të mjeteve të kursyera të qytetarëve në kuadër të Trustit.
Ai e ka kundërshtuar hapur propozimin e Partisë Demokratike të Kosovës, për një tërheqje tjetër.
Madje Hoti tha se po gëzohemi se po e përmbyllim pandeminë bashkë me vendet e tjera të botës dhe se pakot e mbështetjes gjeneroze ekonomike të promovuar nga qeverisja e tyre kanë dhënë rezultate.
E mundësia e tërheqjes së këtyre mjeteve është rikthyer në diskutim sërish, pasi ditë më parë deputeti i PDK-së, Bekim Haxhiu ka ri-propozuar tërheqjen e mjeteve financiare nga Trusti, deri në 30 përqind.
Haxhiu këtë propozim e dha me arsyetimin se është bërë shtrenjtimi i rrymës dhe të gjitha produkteve të konsumit ditur.
“Me kërkesë të shumë qytetarëve ri-propozoj: tërheqjen e mjeteve financiare për qytetarët nga Trusti Pensional deri në 30 për qind. Pas shtrenjtimit të rrymës dhe të gjitha produkteve të konsumit ditor është më se e nevojshme që Qeveria ta sjell në votim propozimin tim për tërheqjen e Trustit Pensional deri në 30 për qind”, kishte kërkuar Haxhiu.
E lidhur me këtë nga Trusti kanë deklaruar se zbatojnë legjislacionin që nxirret nga institucionet e vendit dhe se ka mandat vetëm për menaxhimin e fondeve.
“Fondi i Kursimeve Pensionale i Kosovës e ka për mandat t’i administrojë dhe menaxhojë kontributet pensionale të qytetarëve të Kosovës deri në pensionim. Kjo nënkupton zbatimin e legjislacionit në fuqi, i cili nxirret nga institucionet përgjegjëse të vendit. Pra, ne mund të deklarohemi vetëm për çështjet që bien në fushën e veprimit tonë institucional”, tha zëdhënësi i Trustit, Jeton Demi.
Tërheqja e 10 për qind e mjeteve ishte garantuar me Ligjin për Rimëkëmbjen Ekonomike të votuar në Kuvendin e Kosovës si ndihmë për periudhën e pandemisë COVID-19.
Qeveria me ndryshimin dhe plotësimin e Ligjit për Fondin Pensional kishte paraparë kompensimin e mjeteve të tërhequra në vlerë nën 10 mijë euro. Aplikimi për tërheqjen e këtyre mjeteve kishte qenë i hapur nga 11 dhjetori 2020 deri më 6 prill 2021.
Nga kjo tërheqje kishin përfituar mbi 425 mijë qytetarë, të cilët kishin tërhequr rreth 200 milionë euro.