Kreu i AKR-së, Behgjet Pacolli, ka bërë të ditur se nuk njeh asnjë nga anëtarët e grupit të Zvonko Veselinoviçit, ndaj të cilëve Shtetet e Bashkuara të Amerikës dje u ka vënë sanksione.
Pacolli ka treguar në RTV 21 se Zvonko Veselinoviçin e ka parë në Budva rreth dy vjet më parë me deputetë të Kuvendit të Kosovës nga Lista Serbe.
“Dy vite më parë mua më është ofruar një njeri, që shumë më vonë e kam kuptuar se ishte Zvonko Veselinoviq. Gjatë pushimeve, unë kur isha me anijen time në bregdetin e Adriatikut, në Budva. Dhe ai ka qenë aty me deputetët e atëhershëm të Kuvendit të Kosovës. Shqiptar nuk ka pasë, kanë qenë deputetë të Listës Srpska. Ishte edhe kryetari i Mitrovicës. Unë vetëm i kam përshëndetur. Më vonë e kam kuptuar se aty kishte qenë edhe Zvonko Veselinoviq. Unë nuk e njoh, nuk e kam parë më vonë. As sot nuk e di cili prej tyre ishte, në atë moment në dokun e anijes”, deklaroi Pacolli.
Ai shtoi se e tëra kjo ka qenë vetëm një rastësi.
“Thjeshta na ka rastisur që gjatë ankorimit të anijeve të takohemi. Ata vetëm se ishin aty kur unë shkova. E kemi njohur kryetarin e Mitrovicës së Veriut dhe jemi përshëndetur. Aty ishin edhe tre deputetë po më duket të Kuvendit të Kosovës. Nuk ua di emrat”.