Turqia dhe vendet e tjera duhet ende të bisedojnë me Rusinë për të ndihmuar në përfundimin e luftës në Ukrainë, tha të dielën zëdhënësi presidencial i Turqisë, Ibrahim Kalin, duke shtuar se Kievit i duhej më shumë mbështetje për t’u mbrojtur.
Turqia, anëtare e NATO-s, ka marrëdhënie të mira me Rusinë dhe Ukrainën dhe ka kërkuar të ndërmjetësojë në konfliktin njëmujor.
“Nëse të gjithë djegin urat me Rusinë, atëherë kush do të flasë me ta në fund të ditës”, tha Ibrahim Kalin në forumin ndërkombëtar të Dohas, raporton Reuters.
“Ukrainasit duhet të mbështeten me çdo mjet të mundshëm në mënyrë që ata të mund të mbrohen… por rasti rus duhet të dëgjohet, në një mënyrë ose në tjetrën”, në mënyrë që ankesat e tij të kuptohen nëse nuk justifikohen, shtoi Kalin.
Ankaraja thotë se pushtimi i Rusisë është i papranueshëm, por kundërshton sanksionet perëndimore në parim dhe nuk u është bashkuar atyre.
Ekonomia e Turqisë mbështetet shumë në energjinë, tregtinë dhe turizmin e Rusisë dhe që nga fillimi i luftës më 24 shkurt, mijëra rusë kanë mbërritur në Turqi, duke e parë atë si një strehë të sigurt nga sanksionet.
Ahmet Burak Daglioglu, kreu i zyrës së investimeve të Turqisë, i tha forumit veçmas se disa kompani ruse po zhvendosnin operacionet në Turqi.