Presidenti i Kroacisë, Zoran Milanovic, nuk kishte mëdyshje për shkaktarin kryesor të krizave në Ballkanin Perëndimor kur komentoi edhe krizën në veriun e Kosovës.
Milanovic ka deklaruar se sot kemi kriza në rajon pasi është një pushtet në Beograd që llomotitë për një “botë serbe”. Shprehja e famëkeqe e ministrit ultra nacionalist serb, Aleksandar Vulin, u përmend nga presidenti kroat në vargun e krizave të reja në Ballkan, si ajo në Mal të Zi, Bosnje e Hercegovinë.
President kroat tha se Zagrebi po ndjek ngjarjet në Kosovë megjithëse ajo nuk rrezikon drejtpërdrejtë Kroacinë. Milanovic shtoi një kritikë të tij për të dy palët, si shtet anëtar i BE’së.
“Si Beogradi, ashtu dhe Prishtina me këto qëndrime të ngurta, vështirë se do të përparojnë drejt Bashkimit Europian.”
Milanovic theksoi po ashtu se mospranimi i pavarësisë së Kosovës nga shtete anëtare të Bashkimit Europian është faktor jo stabiliteti.
“Kjo është një pengesë që po e shohim me vite dhe e vështirë të kapërcehet, mund të thërras vetëm për çtensionim” shtoi presidenti kroat.