Alon Ben-Meir, profesor në Universitetin e Johns Hopkins në SHBA, njëherësh edhe njohës i çështjeve të Ballkanit Perëndimor, i ka rekomanduar kryeministrit të Kosovës, Albin Kurtit, të angazhohet më shumë lidhur me çështjen e vaksinimit të kosovarëve me vaksinën anti-Covid.
Ben-Meir, përmes një postimi në llogarinë e tij zyrtare në ‘Twitter’, së këndejmi, e ka konsideruar të papranueshëm faktin se vetëm 14 për qind e Kosovës janë imunizuar kundër koronavirusit nëpërmjet koronavirus.
“#Kurti nuk duhet të përfshihet në punët e brendshme të shteteve fqinje, sikurse bëri në Shqipëri. Në vend të kësaj, ai duhet të merret urgjentisht me çështjet që prekin Kosovën”, ka shkruar profesori amerikan në postimin e tij.
“Është i papranueshëm fakti që vetëm 14% e popullësisë [kosovare] është vaksinuar deri më tani; Kosova duhet t’i japë përparësi vaksinimit të grupeve më të rrezikuara [nga koronavirusi]”, ka thënë tutje Ben-Meir.
Ndonëse shteti ka në dispozicion vetëm rreth 38 mijë vaksina, Ministria e Shëndetësisë i ka ftuar që të vaksinohen grupmoshat 65 deri në 79 vjeç. Në regjistrin e shtetit, statistikat thonë se Kosova ka mbi 130 mijë qytetarë të këtyre grupmoshave.
Mosorganizimi i duhur i procesit të vaksinimit dhe mungesa e vaksinave, bëri që ditë më parë të krijohet tollovi para sallës “1 Tetori”, e cila është qendra e vaksinimit në Prishtinë.
Përveç të moshuarve, me këto doza të vaksinave është paraparë edhe vaksinimi i personelit shëndetësor që ka mbetur pa vaksinuar, personat e mbetur me sëmundje kronike, mësuesit dhe forcat e sigurisë të përfshira drejtpërdrejt në menaxhimin e COVID-19.