Qyteti i Schwäbisch Gmünd dhe “Aktion Sicherheites Gmünd” (aksioni për Gmündin e sigurt) ditë më parë kanë nderuar pronarin e firmës së taksive, Bujar Hajdari, nga ky qytet. Ai u nderua për pengimin e një mashtrimi, të bërë në maj të vitit 2019,
Atij i ishte kërkuar të merrte në taksinë e tij një zonjë 85-vjeçare në një periferi dhe ta çonte atë në një bankë në qytet, transmeton albinfo.ch. 40-vjeçarit kosovar i qe dukur e çuditshme përse zonja duhej të tërhiqte 60,000 euro, siç kishte thënë ajo, “për të ndihmuar në blerjen e shtëpisë së një mikeshe të dyshuar të nipit të saj”.
Kështu, ai nga taksia, informoi policinë, e cila dërgoi punonjësit e saj civilë në adresën e bankës dhe shtëpisë së zonjës, përcjell albinfo.ch. Por, fatkeqësisht, mashtruesit me sa duket e kishin vënë re këtë dhe nuk u paraqitën fare në bankë ose në apartament për të marrë portofolin, të cilin policët e kishin mbushur me letra.
Siç tregohet në një raport të shkurtër televiziv nga SWF, shoferi i taksisë mori lëvdata të mëdha nga Roland Krötz, përgjegjës në Departamentin e marrëdhënieve me publikun, në komandën e policisë në Aalen, transmeton albinfo.ch. Ai me këtë rast ka sqaruar se Hajdari kishte vepruar në mënyrë shembullore, duke bërë pyetje kritike dhe duke përfshirë menjëherë policinë. Ndërhyrja e tij e shpejtë ka parandaluar mashtrimin.
Bujar Hajdari u nderua edhe nga kryebashkiaku i qytetit Schwäbisch Gmünd, Joachim Bläse dhe nga përfaqësuesit e Komandës së Policisë Aalen.