Pas gati dy muajsh lufte, pushtimi rus i Ukrainës nuk ka përfunduar ende. Për momentin, Rusia po punon për të kontrolluar të gjithë Donbasin, ndërkohë që duhet të përballet me pasojat e sanksioneve perëndimore dhe të vazhdojë negociatat për të arritur një marrëveshje me Ukrainën.
Një nga skenarët më të keq që mund të mendohet është përdorimi i armëve bërthamore nga trupat ruse. Frika nuk po rritet vetëm në Perëndim, por edhe në një pjesë të popullsisë ruse që nuk është në favor të strategjisë ushtarake të përshkruar nga Presidenti rus Vladimir Putin. Mes këtij grupi njerëzish është edhe gazetari Dmitri Muratov, fitues i çmimit të fundit Nobel për Paqen.
Muratov nuk përjashtoi përdorimin e armëve bërthamore në Ukrainë nga ushtria ruse: “Mundësia e përdorimit të armëve bërthamore nuk mund të përjashtohet”.
Rusi e cilësoi si “tragjedi të madhe” situatën që po kalon Ukraina dhe paralajmëroi për pasojat që do të kishte për Ukrainën dhe Perëndimin fakti që Rusia mund të përdorë armë bërthamore: “Nëse merret një vendim i tillë, askush nuk do të mund ta ndalojë atë. As Parlamenti, as shoqëria civile”.
Në paraqitjen e tij në Gjenevë me rastin e Ditës Ndërkombëtare të Lirisë së Shtypit, gazetari paralajmëroi edhe për dy njoftime të bëra nga televizioni publik rus, i kontrolluar nga Kremlini: “Për dy javë kemi dëgjuar se këto armë të tmerrshme duhet të përdoren në rast se furnizimet me armë në Ukrainë vazhdojnë”, tha ai.