Mediat në Kosovë raportuan se Spanja është duke planifikuar të hapë një Zyrë Ndërlidhëse në Kosovë.
Madje thanë se për këtë është angazhuar Përfaqësuesi i Lartë i BE-së, Josep Borrell.
Mirëpo kjo gjë është demantuar nga Ministria e Jashtme spanjolle.
Burime diplomatike i ka thënë gazetës “Zëri” se qëndrimi i shtetit spanjoll karshi pavarësisë së Kosovës vazhdon të jetë i pandryshuar.
“Nuk ka asnjë plan për hapje të një Zyre Ndërlidhëse në Prishtinë. Qëndrimi i Spanjës për mosnjohje të pavarësisë, vendim ky i miratuar nga Prishtina në vitin 2008, nuk ka ndryshuar dhe nuk do të ndryshojë derisa çështja të zgjidhet përmes dialogut mes Beogradit dhe Prishtinës”, ka thënë ky burim brenda MPJ-së spanjolle për “Zërin”.
Kjo Ministri e konsideron lajm të mirë rinisjen e dialogut. Madje thotë se është e nevojshme të shfrytëzohet momenti për të tentuar të arrihet një marrëveshje e pranueshme nga të dy palët dhe që respekton Ligjin Ndërkombëtar.
“Për ta arritur këtë qëllim, ne kemi një Përfaqësues të Lartë, zotëri Borrellin, i cili është shumë i interesuar të ndihmojë në zgjidhjen e konfliktit dhe me punën e mrekullueshme të Përfaqësuesit Special të BE-së, Miroslav Lajçak, të cilin e mbështesim plotësisht”, theksoi burimi për “Zërin”.
Spanja, tha më tej ky burim, është e gatshme të bashkëpunojë, “sa më shumë që të mundemi, në këto përpjekje, sepse prioritet për Spanjën është stabiliteti politik dhe prosperiteti ekonomik i Ballkanit”.