Rusia e pranoi sot se ka përdorur për herë të parë raketat hipersonike në Ukrainë.
Siç u cituan autoritetet ruse, qëllimi i përdorimit të tyre ishte shkatërrimi i një baze nëntokësore ukrainase.
Por çka janë armët hipersonike dhe pse ato janë shqetësim ?
Ato janë shkak për shqetësim sepse sistemet tradicionale të paralajmërimit të hershëm të Shteteve të Bashkuara mund të mos jenë në gjendje t’i detektojnë këto armë apo raketa.
Armët hipersonike si “3M22 Zircon” i Rusisë fluturojnë aq shpejt dhe ulët, me shpejtësi deri në 7 mijë e 408 km/h, dhe me një trajektore të ulët atmosferike-balistike — sa mund të depërtojnë në sistemet tradicionale të mbrojtjes kundër raketave.
Raketa fluturon me një karburant të avancuar që rusët thonë se i jep asaj një rreze veprimi deri në 1000 kilometra.
Dhe është aq e shpejtë sa presioni i ajrit përpara armës formon një re plazmatike ndërsa lëviz, duke thithur valët e radios dhe duke e bërë atë praktikisht të padukshëm për sistemet aktive të radarit.
Sistemet e përgjimit të raketave amerikane Aegis kërkojnë 8-10 sekonda kohë reagimi për të kapur sulmet në hyrje. Në ato 8-10 sekonda, raketat ruse Zircon do të kenë udhëtuar tashmë 20 kilometra, dhe raketat interceptore nuk fluturojnë aq shpejt sa të arrijnë ato.
Sipas Popular Mechanics, edhe nëse një anije amerikane do të zbulonte një raketë Zircon nga 100 milje larg, do të kishte vetëm një minutë për të bërë diçka për të.
Për të kapur një raketë ruse Zircon, SHBA-së ose do t’i duhej ta kapte atë në nisje ose të fluturonte një objekt në rrugën e saj.
Kalimi i Rusisë drejt armëve hipersonike ka të ngjarë të jetë një mjet për të luftuar epërsinë amerikane në madhësi, teknologji dhe numër të madh të aeroplanmbajtësve. Marina e SHBA-së synon të mbajë një forcë prej 12 aeroplanmbajtëse me energji bërthamore.