Kryeparlamentari Glauk Konjufca e ka pyetur shefin e grupit parlamentar të PDK-së, Abelard Tahirin nëse ka informata se ai nuk e ka dhënë pagën e kryetarit të Kuvendit për Fondin e Sigurisë.
Tahiri më herët kritikoi krerët e institucioneve dhe deputetët se nuk kanë dhënë shembull duke e dhënë pagën e tyre për fondin e ushtrisë.
“Ti, kryeministri, të gjithë deputetët, shefja e grupit, kryetari i Kuvendit, të gjithë ju, bëhuni shembull, jepeni pagën, tregoni qysh jeni për fond”, tha Tahiri.
“Z. Tahiri, a ke informata që unë nuk e kam dhënë pagën?”, e pyeti kryeparlamentari Konjufca pasi ai e përfundoi fjalën.
“Ka deputetë në baza individuale që e kanë dhënë, të pozitës dhe opozitës”, nisi t’i përgjigjej Tahiri.
Por Konjufca e ndërpreu.
“Unë për shembull e kam dhënë. A ke informata që s’e kam dhënë?”.
“Jo të përmenda si kryetar i Kuvendit”, u arsyetua Tahiri.
Konjufca tha se beson që sikur ai kanë vepruar edhe zyrtarë tjerë publik.
“Z. Tahiri unë për vete e kam dhënë dhe mendoj që duhet me bë publicitet me këtë punë dhe unë mendoj që shumë zyrtarë publik e kanë dhënë, por nuk është punë e publicitetit”, tha kryeparlamentari.
Tahiri theksoi çështjen se si fondi, sipas tij, po mbahet sekret, ndërsa Konjufca e ndërpreu edhe një herë për t’ia bërë edhe një pyetje.
“E tani e kam një pyetje. Meqenëse nuk e dite për mua, nuk e di as për këta tjerët?”.
Kësaj pyetjtje nuk iu përgjigj Tahiri.